8 اسلامی ممالک کی فلسطینیوں کو سزائے موت دینے کے اسرائیلی قانون کی مذمت

اسلام آباد: پاکستان کے دفترِ خارجہ کی جانب سے جاری کردہ ایک اہم مشترکہ بیان میں 8 اسلامی ممالک—پاکستان، ترکیہ، مصر، انڈونیشیا، اردن، قطر، سعودی عرب اور متحدہ عرب امارات کے وزرائے خارجہ نے اسرائیلی پارلیمنٹ کی حالیہ قانون سازی پر شدید تشویش کا اظہار کیا ہے۔ اعلامیے میں مقبوضہ مغربی کنارے میں فلسطینیوں کے لیے سزائے موت کی تجویز کو “امتیازی، جابرانہ اور بین الاقوامی قوانین کے منافی” قرار دے کر مسترد کر دیا گیا ہے۔

مشترکہ بیان میں خبردار کیا گیا ہے کہ اسرائیل کی یہ پالیسیاں خطے میں پہلے سے موجود کشیدگی کو مزید ہوا دے رہی ہیں، جو کہ عالمی امن و استحکام کے لیے ایک سنگین خطرہ ہے۔ وزرائے خارجہ نے فلسطینی قیدیوں کی حالتِ زار پر گہری تشویش کا اظہار کرتے ہوئے کہا کہ معتبر رپورٹس کے مطابق قیدیوں کو بدترین تشدد، بھوک اور بنیادی انسانی حقوق سے محرومی کا سامنا ہے۔

اسلامی ممالک نے عالمی برادری سے پرزور مطالبہ کیا ہے کہ وہ اسرائیل کے ان جارحانہ اقدامات کو روکنے کے لیے فوری اور مؤثر مداخلت کرے اور احتساب کے نظام کو مضبوط بنایا جائے تاکہ فلسطینی عوام کے خلاف ہونے والی زیادتیوں کا خاتمہ ممکن ہو سکے۔