امریکی شہر گریز بورو میں پاکستانی نژاد کامران افضل پولیس چیف مقرر، تعلق کراچی سے ہے

امریکا کے شہر گریز بورو میں پولیس ڈیپارٹمنٹ کی قیادت کے لیے پاکستانی نژاد افسر کامران افضل کو نیا چیف مقرر کر دیا گیا ہے۔

شہر حکام کے مطابق کامران افضل، جو اس وقت ڈیٹن پولیس کے سربراہ ہیں، 13 مئی سے اپنے نئے عہدے کا چارج سنبھالیں گے۔

کامران افضل نے 1991 میں اپنی پیشہ ورانہ زندگی کا آغاز کیا اور مختلف شہروں میں پولیس چیف کے طور پر خدمات انجام دیں۔ ان میں ڈورانگو، ہوپ ویل اور ڈیٹن شامل ہیں۔

تعلیم کے لحاظ سے وہ معاشیات اور انتظامی امور کے شعبے میں اعلیٰ ڈگریاں رکھتے ہیں۔

کامران افضل کی پیدائش پاکستان کے شہر کراچی میں ہوئی اور وہ کم عمری میں اپنے خاندان کے ساتھ امریکا منتقل ہو گئے تھے۔ ان کا شمار تجربہ کار قانون نافذ کرنے والے افسران میں ہوتا ہے۔

تاہم اس تقرری پر شہر میں کچھ حلقوں کی جانب سے تحفظات بھی سامنے آئے۔ مظاہرین نے مطالبہ کیا کہ مقامی سطح پر موجود سینئر افسر کو اس عہدے پر تعینات کیا جائے۔

شہر انتظامیہ کا کہنا ہے کہ یہ فیصلہ شفاف اور سخت انتخابی عمل کے بعد کیا گیا ہے، جس میں ملک بھر سے امیدواروں کا جائزہ لیا گیا۔

یاد رہے کہ سابق پولیس چیف کی ریٹائرمنٹ کے بعد یہ عہدہ عارضی طور پر عبوری سربراہ کے پاس تھا۔