حکومتِ سندھ کا ای وی ٹیکسی منصوبہ شروع، روزگار کے نئے مواقع پیدا کرنے کا اعلان

کراچی: سندھ حکومت نے جدید ٹیکنالوجی اور ماحول دوست ٹرانسپورٹ کے فروغ کے لیے ای وی ٹیکسی پروجیکٹ کا باقاعدہ آغاز کر دیا ہے۔ سینئر صوبائی وزیر شرجیل انعام میمن نے سندھ بینک، سندھ ڈویلپمنٹ فنڈ (SDF) اور سندھ ماس ٹرانزٹ اتھارٹی کے درمیان ہونے والے سہ فریقی معاہدے پر دستخط کیے۔ اس منصوبے کا بنیادی مقصد آصف علی زرداری اور بلاول بھٹو زرداری کے وژن کے مطابق عوام کو سستی اور جدید سفری سہولیات فراہم کرنا ہے۔

تقریب سے خطاب کرتے ہوئے شرجیل میمن نے کہا کہ “پنک بس سروس” کی عالمی کامیابی کے بعد اب ہم “پنک ای وی ٹیکسی” متعارف کروا رہے ہیں، جو خاص طور پر خواتین کو محفوظ سفر فراہم کرے گی اور انہیں معاشی طور پر خود مختار بنائے گی۔ انہوں نے انکشاف کیا کہ خواتین کو بااختیار بنانے کی مہم کے نتیجے میں اب تک 20 ہزار خواتین نے ڈرائیونگ لائسنس کے لیے درخواست دی ہے، جنہیں حکومت مفت تربیت بھی فراہم کر رہی ہے۔

صوبائی وزیر نے مزید کہا کہ حکومت صرف گاڑیاں ہی نہیں لا رہی بلکہ دھابیجی اسپیشل اکنامک زون میں ای وی گاڑیوں کا اپنا مینوفیکچرنگ پلانٹ لگانے کی بھی خواہش مند ہے تاکہ مقامی سطح پر پیداوار بڑھائی جا سکے۔ انہوں نے مہنگائی کے حوالے سے گفتگو کرتے ہوئے کہا کہ حکومت عوام کو ریلیف دینے کے لیے سنجیدہ ہے اور اس سلسلے میں مشترکہ حکمت عملی تیار کی جا رہی ہے۔