آئی ٹی سمیت دیگر شعبوں میں سرمایہ کاری کی سہولت کیلئے پرعزم ہیں: وزیراعظم

اسلام آباد: وزیراعظم شہباز شریف نے وزیراعظم ہاؤس میں عالمی ڈیجیٹل آپریٹر VEON گروپ (جو پاکستان میں ‘جیز’ کا مادر ادارہ ہے) کے سی ای او کان ترزی اوغلو سے ملاقات کی۔ اس موقع پر وزیراعظم نے واضح کیا کہ حکومت بین الاقوامی سرمایہ کاروں، بالخصوص انفارمیشن ٹیکنالوجی کے شعبے میں سرمایہ کاری کی سہولت فراہم کرنے کے لیے پرعزم ہے۔ انہوں نے کہا کہ پاکستان معیشت میں شفافیت لانے کے لیے ڈیجیٹائزیشن کو ترجیح دے رہا ہے۔

وزیراعظم نے ملاقات کے دوران 5G اسپیکٹرم کی نیلامی کا ذکر کرتے ہوئے کہا کہ تمام متعلقہ ادارے عوام کو معیاری انٹرنیٹ سروسز کی فراہمی کے لیے ہم آہنگی سے کام کر رہے ہیں۔ انہوں نے پاکستان کی نوجوان آبادی کو ایک عظیم اثاثہ قرار دیتے ہوئے کہا کہ آئی ٹی اور ڈیجیٹل پلیٹ فارمز میں نوجوانوں کی دلچسپی عالمی سرمایہ کاروں کے لیے ایک پرکشش موقع ہے۔

VEON گروپ کے سی ای او کان ترزی اوغلو نے پاکستان میں کیش لیس اکانومی اور معیشت کی ڈیجیٹائزیشن کے لیے حکومتی اقدامات کی تعریف کی۔ انہوں نے پاکستان کی مارکیٹ پر اعتماد کا اظہار کرتے ہوئے مستقبل میں مزید سرمایہ کاری بڑھانے کے ارادے کا بھی اظہار کیا۔ ملاقات میں وفاقی وزراء محمد اورنگزیب، شزا فاطمہ خواجہ، احد چیمہ اور جیز کے سی ای او عامر ابراہیم بھی شریک تھے۔