وزیراعظم کی پٹرولیم مصنوعات کی سمگلنگ، ذخیرہ اندوزی کیخلاف سخت اقدامات کی ہدایت

اسلام آباد: وزیراعظم محمد شہباز شریف نے پٹرولیم مصنوعات کی سمگلنگ اور غیر قانونی ذخیرہ اندوزی کے خلاف سخت ترین قانونی کارروائی کی ہدایت جاری کر دی ہے۔ خطے کی تیزی سے بدلتی ہوئی صورتحال کے پیشِ نظر منعقدہ اجلاس میں وزیراعظم نے واضح کیا کہ پٹرولیم مصنوعات کی ترسیل میں کسی بھی قسم کی رکاوٹ یا ناجائز منافع خوری برداشت نہیں کی جائے گی۔

اجلاس کے دوران وزیراعظم نے بتایا کہ وفاقی حکومت نے تیل کی قیمتوں کے بوجھ سے عام آدمی کو بچانے کے لیے اپنے ترقیاتی بجٹ میں کٹوتی اور کفایت شعاری کے اقدامات کے ذریعے اب تک 129 ارب روپے کا ریلیف فراہم کیا ہے۔ انہوں نے متعلقہ وزارتوں کو ہدایت کی کہ صوبوں کے ساتھ مشاورت کر کے کم آمدنی والے طبقے کے لیے مزید ریلیف پیکجز کی حتمی تجاویز پیش کی جائیں۔

حکومتی حکمتِ عملی کے تحت اب پٹرولیم مصنوعات کی طلب و رسد اور پوری سپلائی چین کی نگرانی ایک جدید ڈیجیٹل ڈیش بورڈ کے ذریعے کی جا رہی ہے تاکہ شفافیت کو یقینی بنایا جا سکے۔ وزیراعظم کا کہنا تھا کہ حکومت کے بروقت فیصلوں کی بدولت ملک میں پٹرولیم مصنوعات کا وافر ذخیرہ موجود ہے اور سپلائی چین مکمل طور پر محفوظ ہے۔ اجلاس میں وفاقی وزراء احد چیمہ، عطا اللہ تارڑ، علی پرویز ملک، شزا فاطمہ اور دیگر اعلیٰ حکام نے شرکت کی۔