مشرقی وسطیٰ جنگ میں باعث فضائی آپریشن تاحال بحال نہ ہو سکا

مشرقِ وسطیٰ میں جنگ کی اچانک شدت نے عالمی فضائی رابطوں کو درہم برہم کر دیا ہے۔ پاکستان کے تمام بڑے ایئرپورٹس بشمول لاہور، کراچی، اسلام آباد، ملتان اور پشاور سے خلیجی ممالک جانے اور وہاں سے آنے والی 65 پروازیں منسوخ ہو گئی ہیں، جبکہ 35 سے زائد پروازیں کئی گھنٹوں کی تاخیر کا شکار ہیں۔ اس صورتحال نے ہزاروں مسافروں اور خصوصاً عمرہ زائرین کو ایئرپورٹس پر محصور کر دیا ہے۔

فلائٹ انفارمیشن کے مطابق، ایران، امریکہ اور اسرائیل کے درمیان کشیدگی کے باعث مشرقِ وسطیٰ کے 7 سے 8 بڑے ایئرپورٹس اس وقت مکمل یا جزوی طور پر بند ہیں، جہاں آپریشنل صلاحیت 20 سے 30 فیصد تک رہ گئی ہے۔ جنگ سے قبل دبئی سے روزانہ 1200 اور ریاض سے 675 پروازیں آپریٹ ہوتی تھیں، جو اب نہ ہونے کے برابر ہیں۔ بیشتر پروازیں یا تو منسوخ کر دی گئی ہیں یا انہیں فضائی حدود کی بندش کے باعث آدھے راستے سے واپس موڑ دیا گیا ہے۔

ایئر لائنز کو نہ صرف آپریشنل بلکہ شدید مالی مشکلات کا بھی سامنا ہے، کیونکہ جنگ کے باعث جیٹ فیول کی قیمتوں میں ریکارڈ اضافہ ہوا ہے۔ پاکستان ایئرپورٹ اتھارٹی کا کہنا ہے کہ تمام ملکی و غیر ملکی ایئر لائنز کو بین الاقوامی قوانین کے مطابق لینڈنگ اور پارکنگ کی سہولیات فراہم کی جا رہی ہیں۔ مسافروں کی مشکلات کو کم کرنے کے لیے ایئر لائنز نے ری شیڈولنگ کا عمل شروع کر دیا ہے، تاہم فلائٹ آپریشنز کی مکمل بحالی صورتحال کی بہتری سے مشروط ہے۔