مشرق وسطیٰ کشیدگی: سعودی وزیر خارجہ فرحان بن فیصل پاکستان پہنچ گئے، نائب وزیر اعظم سے ملاقات

اسلام آباد: سعودی عرب کے وزیر خارجہ فرحان بن فیصل آج خصوصی طیارے کے ذریعے اسلام آباد کے نور خان ائیر بیس پہنچے۔ ان کا دورہ مشرق وسطیٰ میں جاری کشیدگی کے تناظر میں انتہائی اہمیت کا حامل ہے۔

وزیر خارجہ فرحان بن فیصل دفتر خارجہ پہنچے اور انہوں نے نائب وزیر اعظم اسحاق ڈار سے ملاقات کی۔ ملاقات میں دوطرفہ، علاقائی اور عالمی امور پر تبادلہ خیال کیا گیا۔ دونوں ممالک کے درمیان برادرانہ تعلقات اور خطے کے معاملات پر مفصل گفتگو ہوئی۔

یاد رہے کہ گزشتہ روز مصر اور ترکیہ کے وزرائے خارجہ بھی اسلام آباد پہنچ چکے تھے اور انہوں نے نائب وزیر اعظم سے ملاقات کی تھی۔ آج پاکستان، سعودی عرب، ترکیہ اور مصر کے وزرائے خارجہ مشرق وسطیٰ میں جاری کشیدگی کو کم کرنے کے لیے اہم اجلاس کریں گے۔