امریکی صدر ٹرمپ نے اسحاق ڈار کی پوسٹ شیئر کردی

واشنگٹن: امریکی صدر ڈونلڈ ٹرمپ نے پاکستان کے نائب وزیراعظم اور وزیر خارجہ اسحاق ڈار کی سوشل میڈیا پوسٹ شیئر کر دی۔

امریکی صدر نے اپنے سوشل میڈیا پلیٹ فارم پر اسحاق ڈار کی پوسٹ کا عکس شیئر کیا، جس میں آبنائے ہرمز سے پاکستانی جہازوں کو گزرنے کی اجازت کا ذکر کیا گیا تھا۔

اسحاق ڈار نے اپنی پوسٹ میں بتایا تھا کہ پاکستانی پرچم بردار مزید 20 جہازوں کو آبنائے ہرمز سے گزرنے کی اجازت مل گئی ہے، اور روزانہ دو جہاز اس راستے سے گزریں گے۔

انہوں نے ایران کے اس اقدام کو خوش آئند اور تعمیری قرار دیتے ہوئے کہا تھا کہ اس پیشرفت کی تعریف ہونی چاہیے، کیونکہ یہ خطے میں امن اور استحکام کے فروغ کا پیش خیمہ ثابت ہو سکتی ہے۔

اسحاق ڈار کا کہنا تھا کہ یہ مثبت اعلان امن کی جانب ایک اہم قدم ہے جو مشترکہ کوششوں کو مزید مضبوط کرے گا، جبکہ مذاکرات، سفارتکاری اور اعتماد سازی ہی آگے بڑھنے کا واحد راستہ ہیں۔