پاک-ایران تجارت میں بڑی پیش رفت: برآمد کنندگان کے لیے ‘بینک گارنٹی اور ایل سی’ کی شرط سے عارضی استثنیٰ کا اعلان

اسلام آباد/کراچی: وفاقی وزیرِ تجارت جام کمال خان کی ہدایت پر وفاقی حکومت نے برآمدات کے فروغ اور علاقائی تجارتی روابط کو مضبوط بنانے کے لیے ایک بڑا فیصلہ کیا ہے۔ وزارتِ تجارت نے ایران اور وسطی ایشیائی ریاستوں (Central Asian States) کو کی جانے والی برآمدات پر فنانشل انسٹرومنٹ، بینک گارنٹی اور لیٹر آف کریڈٹ (LC) کی شرط سے عارضی استثنیٰ منظور کر لیا ہے۔ یہ خصوصی رعایت 24 مارچ سے 21 جون 2026 تک تین ماہ کے لیے نافذ العمل ہوگی۔

اس تاریخی اقدام کے تحت اب پاکستان، ایران کے زمینی راستے کو استعمال کرتے ہوئے آذربائیجان اور وسطی ایشیائی ممالک کو چاول، سمندری خوراک (Seafood)، آلو، گوشت، پیاز، مکئی، پھل، فارماسیوٹیکل مصنوعات اور ٹینٹس (Tents) برآمد کر سکے گا۔ وفاقی وزیر جام کمال خان کا کہنا ہے کہ اس فیصلے سے برآمد کنندگان کے اخراجات اور وقت میں نمایاں کمی آئے گی اور ادویات کی برآمدات میں حائل رکاوٹیں دور کرنا حکومت کی اولین ترجیح ہے۔

اگرچہ اسٹیٹ بینک کے بعض ضوابط سے جزوی استثنیٰ دیا گیا ہے، تاہم برآمدی آمدن (Export Proceeds) کو مقررہ مدت میں واپس لانے کی شرط برقرار رہے گی۔ وزارتِ تجارت کے مطابق، اس اقدام کا مقصد علاقائی تجارتی حجم میں اضافہ کرنا اور پاکستان کو معاشی استحکام کی طرف لے جانا ہے۔ جام کمال خان نے واضح کیا کہ حکومت برآمد کنندگان کو سہولت فراہم کرنے کے لیے تمام دستیاب وسائل بروئے کار لا رہی ہے تاکہ عالمی منڈیوں تک پاکستانی مصنوعات کی رسائی کو یقینی بنایا جا سکے۔