وزیراعظم شہباز شریف کا صدرِ ایران سے رابطہ، اسرائیلی حملوں کی مذمت، یکجہتی کا اظہار کیا

اسلام آباد: وزیراعظم محمد شہباز شریف نے ایرانی صدر ڈاکٹر مسعود پزشکیان سے ایک گھنٹے سے زائد طویل ٹیلیفونک گفتگو کی، جس میں انہوں نے ایران کی شہری تنصیبات پر اسرائیل کے حالیہ حملوں کی شدید الفاظ میں مذمت کی۔ وزیراعظم نے ان مشکل حالات میں ایرانی عوام کے ساتھ پاکستان کی مکمل یکجہتی کا اظہار کیا اور حملوں کے نتیجے میں ہونے والے جانی و مالی ضیاع پر گہرے دکھ اور افسوس کا اظہار کیا۔

گفتگو کے دوران وزیراعظم نے ایرانی صدر کو پاکستان کی جانب سے جاری اعلیٰ سطح کی سفارتی کوششوں سے آگاہ کیا۔ انہوں نے بتایا کہ نائب وزیراعظم اسحاق ڈار اور فیلڈ مارشل سید عاصم منیر کی مشاورت سے امریکہ، برادر خلیجی ممالک اور دیگر اسلامی ممالک کے ساتھ مسلسل رابطے کیے جا رہے ہیں تاکہ خطے میں جاری کشیدگی کو ختم کر کے امن مذاکرات کے لیے سازگار ماحول پیدا کیا جا سکے۔ وزیراعظم نے اس امید کا اظہار کیا کہ ان اجتماعی کوششوں سے کشیدگی کے خاتمے کی کوئی مؤثر راہ نکلے گی۔

ایرانی صدر ڈاکٹر مسعود پزشکیان نے وزیراعظم شہباز شریف کی مخلصانہ سفارتی کاوشوں اور پاکستان کے مثبت کردار کو سراہا۔ انہوں نے اسرائیل کے جارحانہ اقدامات کے حوالے سے ایران کا اصولی مؤقف بیان کرتے ہوئے واضح کیا کہ کسی بھی مذاکرات یا ثالثی کے لیے فریقین کے درمیان “اعتماد سازی” (Confidence Building) کی اشد ضرورت ہے۔ وزیراعظم نے یقین دلایا کہ پاکستان خطے میں استحکام کے فروغ کے لیے اپنا تعمیری اور غیر جانبدارانہ کردار جاری رکھے گا۔