پاکستان مخالف بھارتی و افغان سازش بے نقاب: سوشل میڈیا پر جعلی ایرانی اکاؤنٹس کے ذریعے پروپیگنڈا مہم کا انکشاف

اسلام آباد: پاکستان اور خطے کے امن کے خلاف بھارت اور افغانستان کی ایک بڑی مبینہ سازش بے نقاب ہو گئی ہے، جس کے تحت سوشل میڈیا پر جعلی اکاؤنٹس اور “گھوسٹ نیٹ ورکس” کے ذریعے منظم پاکستان مخالف پروپیگنڈا مہم چلائی جا رہی تھی۔ تحقیقاتی رپورٹس کے مطابق، پاکستان کے خلاف مصنوعی ایرانی ردعمل درحقیقت افغانستان سے آپریٹ ہونے والے اکاؤنٹس کے ذریعے پھیلایا گیا، جبکہ اس پورے آپریشن کی سٹریٹجک ڈائریکشن اور بیانیہ سازی کے ماسٹر مائنڈ بھارتی اکاؤنٹس نکلے ہیں۔

ذرائع کا کہنا ہے کہ اس مہم میں جعلی ایرانی شناختوں کا سہارا لے کر پاکستان کے خلاف نفرت انگیز بیانیہ گھڑا گیا تاکہ عالمِ اسلام میں بداعتمادی اور تقسیم پیدا کی جا سکے۔ اس ڈس انفارمیشن آپریشن کے تحت پاکستان پر امریکہ کے لیے تیل کی ترسیل جیسے بے بنیاد الزامات بھی عائد کیے گئے تاکہ پاکستان اور ایران کے تعلقات میں دراڑ ڈالی جا سکے۔ سکیورٹی ذرائع کے مطابق، یہ مربوط انفارمیشن وارفیئر نہ صرف پاکستان بلکہ امریکہ، ایران اور پورے خطے کے امن و سفارتکاری پر براہِ راست حملہ ہے۔

ماہرین کا کہنا ہے کہ اس سازش کے بے نقاب ہونے سے عالمی سطح پر پاکستان کا امن پسندانہ کردار ایک بار پھر نمایاں ہو گیا ہے۔ یہ ثابت ہو گیا ہے کہ پاکستان کے ادارے مذاکرات کے دشمنوں اور ڈجیٹل دہشت گردی کے خلاف پوری طرح چوکنا ہیں۔ عوام کو بھی خبردار کیا گیا ہے کہ وہ سوشل میڈیا پر موجود ایسی جعلی شناختوں اور پروپیگنڈے سے ہوشیار رہیں جن کا مقصد ملک کی ساکھ کو نقصان پہنچانا اور اداروں کے خلاف بداعتمادی پیدا کرنا ہے۔