وزیراعظم کو ملائیشین ہم منصب کا فون، پاکستان کی امن کوششوں کیلئے مکمل حمایت کا اعادہ

اسلام آباد: وزیراعظم محمد شہباز شریف اور ملائیشیا کے وزیراعظم داتو سری انور ابراہیم کے درمیان ایک اہم ٹیلی فونک رابطہ ہوا ہے، جس میں دونوں رہنماؤں نے عید الفطر کی مبارکباد کا تبادلہ کیا اور امتِ مسلمہ کے اتحاد، امن اور خوشحالی کے لیے خصوصی دعائیں کیں۔ اس موقع پر ملائیشین وزیراعظم نے مشرقِ وسطیٰ میں جاری کشیدگی کے خاتمے کے لیے پاکستان کے کلیدی کردار اور سفارتی ثالثی کی کوششوں کو بھرپور انداز میں سراہا ہے۔وزیراعظم شہباز شریف نے اپنے ملائیشین ہم منصب کو پاکستان کے حالیہ سفارتی اقدامات سے آگاہ کیا، جس کا مقصد امریکہ اور ایران کو مذاکرات کی میز پر لانا اور خطے میں استحکام پیدا کرنا ہے۔ انہوں نے برادر خلیجی ممالک اور ایرانی قیادت کے ساتھ ہونے والی بات چیت کے تناظر میں کشیدگی کم کرنے پر زور دیا۔ وزیراعظم انور ابراہیم نے شہباز شریف کی قیادت پر اعتماد کا اظہار کرتے ہوئے کہا کہ ملائیشیا امن کی ان کوششوں میں پاکستان کی مکمل حمایت کرتا ہے۔

دونوں عالمی رہنماؤں نے اس بات پر اتفاق کیا کہ مشرقِ وسطیٰ میں جنگ کا فوری خاتمہ ناگزیر ہے۔ ملائیشین وزیراعظم نے اپنے حالیہ عالمی رابطوں کا ذکر کرتے ہوئے امن کے قیام کے لیے پاکستان کے ساتھ مل کر کام کرنے کی پیشکش کی۔ وزیراعظم شہباز شریف نے اس حمایت پر شکریہ ادا کیا اور اعادہ کیا کہ پاکستان خطے میں مخلصانہ اور حقیقی امن اقدامات جاری رکھے گا۔