نئی نسل کو منشیات سے بچانے کیلئے بھرپور کریک ڈاؤن جاری رہے گا: محسن نقوی

راولپنڈی: وفاقی وزیرِ داخلہ و انسداد منشیات محسن نقوی نے اینٹی نارکوٹکس فورس (ANF) کے ہیڈ کوارٹرز کا دورہ کیا، جہاں ڈی جی اے این ایف میجر جنرل عبدالمعید نے ان کا استقبال کیا۔ وزیرِ داخلہ نے زیرِ تعمیر ‘نیشنل کاؤنٹر نارکوٹکس کوآرڈینیشن سنٹر’ کا معائنہ کیا اور اے این ایف کی آپریشنل کارکردگی کا جائزہ لینے کے لیے منعقدہ اعلیٰ سطح کے اجلاس کی صدارت کی۔

اجلاس کے دوران بریفنگ میں بتایا گیا کہ اے این ایف کی کوششوں سے منشیات کے جرائم میں سزا کی شرح 82 فیصد تک پہنچ گئی ہے، جبکہ 22 ملکی اور 9 غیر ملکی منشیات اسمگلنگ کرنے والی تنظیموں کے نیٹ ورک کو کامیابی سے توڑا گیا ہے۔ وفاقی وزیر کو پوپی (افیون) کی فصل کی تلفی اور تعلیمی اداروں میں منشیات کے بڑھتے ہوئے رجحان کو روکنے کے لیے کیے گئے اقدامات پر بھی بریفنگ دی گئی۔

محسن نقوی نے اے این ایف کی کارکردگی کو سراہتے ہوئے کہا کہ نئی نسل کو اس لعنت سے بچانے کے لیے ہر سطح پر کریک ڈاؤن جاری رہے گا۔ انہوں نے تعلیمی اداروں میں آگاہی مہم کو مزید مؤثر بنانے کی ہدایت کی۔ اس موقع پر حال ہی میں شہید ہونے والے اے این ایف کے 6 اہلکاروں کے لیے دعا کی گئی اور ملازمین کی فلاح و بہبود کے لیے ‘اے این ایف فاؤنڈیشن’ کے قیام کی اصولی منظوری بھی دی گئی۔