پاکستان اورچین کی 9روزہ  بحری مشق ’سی گارڈین 4‘ کا آغاز

پاکستان اور چین کے درمیان نو روزہ بحری مشق سی گارڈین 4 کا آغاز ہوگیا۔ مشقوں میں شرکت کےلیے چینی بحریہ کا جہاز’داچنگ‘ کراچی پہنچاتواس کا پُرتپاک استقبال کیاگیا۔پی ایل اے کے جہاز داچنگ کو پاک بحریہ کے جہازوں کے ہمراہ بندرگاہ تک لایا گیا۔

آئی ایس پی آر کے مطابق سی گارڈین مشقیں 2اپریل تک جاری رہیں گی۔ ان مشقوں کا مقصد دونوں بحری افواج کے مابین آپریشنل ہم آہنگی کو فروغ دے کر تعلقات کو مزید مستحکم بنانا ہے، جو علاقائی امن کے لیے مشترکہ عزم کی بھی عکاسی کرتا ہے۔

اس مشق کے دوران بندرگاہ اور سمندر میں مختلف سرگرمیاں انجام دی جائیں گی، جن میں ماہرین کےدرمیان  تبادلہ خیال، نوجوان افسران کا عصری موضوعات پر سیمیناراور بحری سلامتی  کی مشقیں شامل ہیں۔

سی گارڈین مشقوں کا سلسلہ پاکستان اور چین کے مابین مضبوط تعلقات اور علاقائی امن و استحکام کے لیے مشترکہ عزم کا مظہر ہے۔