وزیراعظم اور بلاول بھٹو کی ملاقات، ایران جنگ میں پاکستان کے کردار پر اعتماد میں لیا

اسلام آباد: مشرقِ وسطیٰ میں تیزی سے بدلتی ہوئی صورتحال اور قومی سلامتی کے درپیش چیلنجز پر غور کے لیے وزیراعظم ہاؤس میں ایک انتہائی اہم اجلاس منعقد ہوا ہے۔ وزیراعظم شہباز شریف سے چیئرمین پیپلز پارٹی بلاول بھٹو زرداری نے ملاقات کی، جس میں وزیراعلیٰ سندھ مراد علی شاہ، وزیراعلیٰ بلوچستان سرفراز بگٹی اور وفاقی وزراء بھی شریک ہوئے۔

ملاقات کے دوران وزیراعظم نے خطے کی کشیدہ صورتحال، بالخصوص ایران سے متعلق حالیہ پیش رفت پر اتحادی قیادت کو اعتماد میں لیا۔ ذرائع کے مطابق وزیراعظم نے پاکستان کے ممکنہ کردار اور سفارتی حکمتِ عملی پر تفصیلی تبادلہ خیال کیا۔ اس موقع پر ملک بھر میں توانائی کی بچت اور ایندھن کے ذخائر کے تحفظ کے لیے ‘سمارٹ لاک ڈاؤن’ کی مجوزہ حکمتِ عملی پر بھی وزرائے اعلیٰ کو بریفنگ دی گئی۔

اجلاس کے بعد یہ طے پایا ہے کہ وزیراعظم شہباز شریف آج شام ایوانِ صدر میں صدرِ مملکت آصف علی زرداری سے بھی ملاقات کریں گے۔ اس اہم ملاقات میں وزیراعظم صدر کو امریکہ اور ایران کے درمیان ثالثی (Mediation) سے متعلق پاکستان کے حتمی فیصلے سے آگاہ کریں گے۔ سیاسی ماہرین اس بیٹھک کو ملکی تاریخ کے ایک حساس موڑ پر قومی یکجہتی اور متفقہ خارجہ پالیسی کی جانب ایک بڑا قدم قرار دے رہے ہیں۔