کفایت شعاری: سندھ کابینہ کا 3 ماہ تنخواہ نہ لینے اور ورک فرام ہوم کا فیصلہ

کراچی: صوبائی وزیر اطلاعات شرجیل انعام میمن نے سندھ کابینہ کے اہم فیصلوں کا اعلان کرتے ہوئے کہا ہے کہ ایندھن کی بچت اور معاشی استحکام کے لیے حکومتِ سندھ وفاقی حکومت کے تمام اقدامات پر مکمل عمل درآمد کرے گی۔ موجودہ صورتحال سے نمٹنے کے لیے سندھ کابینہ نے رضاکارانہ طور پر 3 ماہ کی تنخواہ نہ لینے کا بڑا فیصلہ کیا ہے۔

پریس کانفرنس کرتے ہوئے شرجیل میمن نے بتایا کہ توانائی کے ذخائر کو محفوظ بنانے کے لیے سندھ میں جمعہ کے روز ‘ورک فرام ہوم’ (گھر سے کام) کی پالیسی اپنائی جا رہی ہے تاکہ ٹریفک اور ایندھن کے استعمال میں کمی لائی جا سکے۔ اس کے ساتھ ساتھ سرکاری گاڑیوں کی ایک بڑی تعداد کو بھی فوری طور پر گراؤنڈ کر دیا گیا ہے۔

صوبائی وزیر نے واضح کیا کہ اگر وفاقی حکومت ملک گیر لاک ڈاؤن کا فیصلہ کرتی ہے تو سندھ حکومت اس پر لبیک کہے گی۔ انہوں نے عوام سے بھی اپیل کی کہ وہ توانائی کی بچت میں حکومت کا ساتھ دیں کیونکہ یہ ایک مشترکہ قومی مسئلہ ہے۔ شرجیل میمن کا مزید کہنا تھا کہ پبلک ٹرانسپورٹ کے حوالے سے بھی اہم اصلاحات کی جا رہی ہیں تاکہ عوام کو سہولت فراہم کرنے کے ساتھ ساتھ ایندھن کی کھپت کو کنٹرول میں رکھا جا سکے۔