لودھراں کے قریب تیزگام ٹرین کو حادثہ، 4 بوگیاں الٹنے سے 25 افراد زخمی، 8کی حالت تشویشناک

پنجاب کے ضلع لودھراں میں افسوسناک ٹرین حادثہ پیش آیا ہے جہاں تیزگام ایکسپریس کی 4 بوگیاں پٹری سے اتر گئیں، جس کے نتیجے میں کم از کم 25 افراد زخمی ہو گئے۔ یہ واقعہ لودھراں کے نواحی علاقے آدم واہن کے قریب رونما ہوا۔

مقامی انتظامیہ کے مطابق حادثے کی اطلاع ملتے ہی امدادی ٹیمیں جائے وقوعہ پر پہنچ گئیں اور زخمیوں کو فوری طور پر اسپتال منتقل کیا گیا۔ ڈپٹی کمشنر نے حادثے کی تفصیلات بتاتے ہوئے واضح کیا کہ 25 زخمیوں میں سے 17 مسافروں کو ابتدائی طبی امداد دینے کے بعد فارغ کر دیا گیا ہے، جبکہ 8 شدید زخمی مسافر تاحال ضلعی ہیڈ کوارٹر اسپتال میں زیر علاج ہیں جن کی حالت نازک بتائی جاتی ہے۔

دوسری جانب اسٹیشن ماسٹر کا کہنا ہے کہ متاثرہ ٹرین کو 5 بوگیوں کے ساتھ کراچی کے لیے روانہ کر دیا گیا ہے۔ تاہم، ڈاؤن ٹریک پر کراچی جانے والی دیگر مسافر ٹرینوں کو لودھراں اسٹیشن پر ہی روک لیا گیا ہے تاکہ ٹریک کی بحالی کا کام مکمل کیا جا سکے۔