چین کی مشرق وسطیٰ کی صورتحال میں پاکستان کے کردار کی تعریف

اسلام آباد: چین نے مشرقِ وسطیٰ کی حالیہ کشیدہ صورتحال میں پاکستان کے مثبت اور سفارتی کردار کی بھرپور تعریف کرتے ہوئے واضح کیا ہے کہ وہ طاقت کے استعمال کے بجائے مذاکرات کے ذریعے تنازعات کے حل کا حامی ہے۔ اسلام آباد میں پریس کانفرنس کرتے ہوئے چینی سفیر جیان زیڈانگ نے کہا کہ مشرقِ وسطیٰ میں پاکستان کی ثالثی کی کوششیں قابلِ ستائش ہیں اور چین اس ضمن میں پاکستان کے ساتھ کھڑا ہے۔

چینی سفیر نے سخت موقف اپناتے ہوئے کہا کہ چین یک طرفہ اقدامات، طاقت کی سیاست اور بین الاقوامی قوانین کو ملکی قوانین کے تابع کرنے کی ہرگز اجازت نہیں دے گا۔ انہوں نے زور دیا کہ غیر فوجی اہداف اور سویلین آبادی پر حملے فوری بند ہونے چاہئیں اور عالمی بحری راستوں کی سلامتی میں کسی قسم کا خلل نہیں پڑنا چاہیے۔ جیان زیڈانگ کا کہنا تھا کہ موجودہ صورتحال میں اقوامِ متحدہ کے چارٹر کی کھلم کھلا خلاف ورزی ہو رہی ہے جو عالمی امن کے لیے خطرہ ہے۔

انہوں نے مزید کہا کہ چین کی اپنی ثالثی کی کوششیں بھی تنازع کے مستقل حل تک جاری رہیں گی۔ چینی سفیر کے مطابق بیجنگ اور اسلام آباد خطے میں امن کی بحالی کے لیے مشترکہ وژن رکھتے ہیں اور دونوں ممالک عالمی قوانین کی پاسداری پر یقین رکھتے ہیں۔