یومِ پاکستان 23 مارچ: ملک بھر میں ملی جوش و جذبہ،تقریبات جاری

اسلام آباد/لاہور: پاکستان بھر میں آج 23 مارچ ‘یومِ پاکستان’ روایتی ملی جوش و جذبے اور مادرِ وطن سے تجدیدِ عہد کے طور پر منایا جا رہا ہے۔ دن کا آغاز وفاقی دارالحکومت میں 31 اور صوبائی دارالحکومتوں میں 21 توپوں کی سلامی سے ہوا، جس کے بعد مساجد میں ملکی سلامتی اور ترقی کے لیے خصوصی دعائیں مانگی گئیں۔

رواں سال مشرقِ وسطیٰ کی کشیدہ صورتحال اور ملکی سطح پر جاری ‘کفایت شعاری مہم’ کے پیشِ نظر یومِ پاکستان کی تقریبات کو سادہ رکھا گیا ہے۔ حکومت نے اس موقع پر ہونے والی روایتی فوجی پریڈ منسوخ کر دی ہے، جبکہ مرکزی پرچم کشائی کی تقریب بھی انتہائی پروقار مگر سادہ انداز میں منعقد کی گئی۔ کراچی میں گورنر سندھ اور وزیراعلیٰ مراد علی شاہ نے مزارِ قائد پر حاضری دی، پھول چڑھائے اور فاتحہ خوانی کی۔

لاہور میں مزارِ اقبال پر گارڈز کی تبدیلی کی پروقار تقریب منعقد ہوئی، جہاں پاک فضائیہ کے چاک و چوبند دستے نے ستلج رینجرز سے مزار کی سکیورٹی کا چارج سنبھال لیا۔ تقریب کے مہمانِ خصوصی ایئر وائس مارشل محمد شاہد افضال تھے، جنہوں نے شاعرِ مشرق کے مزار پر فاتحہ خوانی کی اور مہمانوں کی کتاب میں اپنے تاثرات قلمبند کیے۔ سادگی کے باوجود شہریوں میں یومِ پاکستان کی اہمیت اور قومی جذبہ بھرپور طریقے سے نمایاں نظر آ رہا ہے۔