پنجاب میں جرائم کی شرح میں نمایاں کمی آئی ہے: عظمیٰ بخاری

وزیر اطلاعات پنجاب عظمیٰ بخاری نے کہا ہے کہ صوبے میں جرائم کی شرح میں تیزی سے کمی واقع ہوئی ہے، جو حکومت کی مؤثر حکمت عملی کا نتیجہ ہے۔

عظمیٰ بخاری نے اپنے بیان میں کہا کہ وزیراعلیٰ پنجاب مریم نواز کی بہتر حکمت عملی کی بدولت جرائم میں کمی آئی ہے، اور اس میں سی سی ڈی اور پنجاب پولیس نے کلیدی کردار ادا کیا ہے۔

انہوں نے بتایا کہ پنجاب کے متعدد اضلاع میں روزانہ ہونے والی معمولی جرائم کی وارداتیں بھی نمایاں طور پر کم ہو گئی ہیں، اور وزیراعلیٰ نے سی سی ڈی کی بڑھتی ہوئی عوامی پذیرائی کو دیکھتے ہوئے اسے ایک پریمیئر ایجنسی بنانے کا فیصلہ کیا ہے۔

وزیر اطلاعات نے مزید کہا کہ اب پنجاب میں امن و امان کی صورتحال بہتر ہو رہی ہے اور جرائم کے اعداد و شمار حوصلہ افزا ہیں، اور خواتین کا تحفظ وزیراعلیٰ کی پہلی ترجیح اور ریڈ لائن ہے۔ پنجاب پولیس کے ہر افسر اور اہلکار کو ہدایت دی گئی ہے کہ شہریوں سے مؤدبانہ انداز میں “سر” اور “جناب” کہہ کر مخاطب ہوں۔