ایران میں امریکی و اسرائیلی حملے جاری، شہری اور امدادی کارکن متاثر

امریکی اور اسرائیلی فورسز کے ایران میں حملے جاری ہیں، فضائی حملوں کے دوران ایرانی ہلال احمر کے تین کارکنان زخمی ہوگئے ہیں۔ امریکا نے ایران کے اٹھاون بحری جہاز تباہ اور اکتیس بارودی سرنگیں ناکارہ بنانےکا دعویٰ کیا ہے۔ اسرائیلی فوج نے کہا ہے کہ ایرانی حکومت کے انفرا اسٹرکچر کو نشانہ بنایا جا رہا ہے، اسرائیلی فوج نے ایران میں نیوکلیئر پروگرام کی اہم سائٹس کو بھی نشانہ بنانے کا دعویٰ کیا ہے، تہران کے قریب طالقان میں واقع سائٹ کو جنگی جہازوں نے نشانہ بنایا ہے۔ جبکہ یونیسف نےکہا ہے کہ جنگ کے آغاز سے اب تک خطے میں گیارہ سو سے زائد بچے جاں بحق یا زخمی ہوچکے ہیں، ان میں دو سو بچے ایران، اکیانوے لبنان ، چار اسرائیل اور ایک بچہ کویت میں شہید ہوئے۔ ایران کے اقوام متحدہ میں نمائندے میں امیر سعید ایراوانی کے مطابق اب تک ایک ہزار تین سو اڑتالیس شہری جاں بحق اور سترہ ہزار سے زائد زخمی ہو چکے ہیں۔ مقامی میڈیا کے مطابق ایران کے مختلف شہروں میں بمباری اور دھماکوں کی شدت بڑھ گئی ہے، تازہ حملے تہران قم روڈ پر ہوئے، اسرائیلی فضائی حملوں کے نتیجے میں انسانی امداد فراہم کرنے والے عملے بھی متاثر ہو رہے ہیں۔ ایران پر امریکا اور اسرائیل کے مشترکہ حملوں کے دوران عام شہریوں اور امدادی کارکنوں کو نقصان پہنچنے کی اطلاعات سامنے آ رہی ہیں جن سے انسانی امداد اور سروسز کی فراہمی متاثر ہو رہی ہے۔