عالمی یومِ خواتین: نیویارک میں پاکستانی قونصل خانے میں تقریب، خواتین کے کردار کو خراج تحسین

نیویارک: عالمی یومِ خواتین کے موقع پر نیویارک میں پاکستان کے قونصل خانے اور شمالی امریکا میں پاکستانی کاروباری افراد کی تنظیم کے اشتراک سے ایک خصوصی تقریب منعقد کی گئی جس میں کمیونٹی کے افراد، ماہرین اور کاروباری شخصیات نے شرکت کی۔

تقریب سے خطاب کرتے ہوئے نیویارک میں پاکستان کے قونصل جنرل عامر احمد اَتوزئی نے کہا کہ خواتین کو مساوی مواقع فراہم کرنا اور ان کے لیے محفوظ اور حوصلہ افزا ماحول پیدا کرنا معاشرے کی مشترکہ ذمہ داری ہے۔ انہوں نے کہا کہ خواتین کی شمولیت کے بغیر ترقی کا عمل مکمل نہیں ہو سکتا۔

تقریب میں پاکستانی نژاد معروف معالج ڈاکٹر عذرا رضا کے ساتھ ایک خصوصی نشست بھی منعقد کی گئی جس میں انہوں نے اپنی پیشہ ورانہ زندگی کے تجربات اور کامیابیوں سے متعلق گفتگو کی۔ انہوں نے خواتین کو آگے بڑھنے اور اپنے خواب پورے کرنے کے لیے حوصلہ افزائی کی۔

تقریب کے شرکاء نے خواتین کی کامیابیوں کو سراہتے ہوئے اس بات پر زور دیا کہ معاشرے میں خواتین کو مزید بااختیار بنانے کے لیے مشترکہ اقدامات ضروری ہیں۔