ایران پر امریکہ اور اسرائیل کے حملوں میں شدت، آٹھویں روز شہداء کی تعداد 1332 ہوگئی

امریکا اور اسرائیل کے ایران پر حملے آٹھویں روز میں داخل ہوگئے، حملوں میں ایرانی شہداء کی تعداد ایک ہزار تین سو بتیس تک پہنچ گئی۔ امریکا اور اسرائیل نے رات گئے تہران میں سرکاری اہداف پر بڑے پیمانے پر فضائی حملے کیے۔ امریکا نے دعویٰ کیا کہ حملوں میں بی ٹو بمبار، ایف ففٹین، ایف سکسٹین، ایف ایٹین، ایف ٹوئنٹی ٹو ریپٹر اور ایف تھرٹی فائیو، اے ٹین طیاروں کا استعمال کیا گیا۔ ایرانی سرکاری ٹی وی نے رپورٹ کیا کہ تہران کے مہرآباد ہوائی اڈے پر فضائی حملہ کیا گیا جہاں کھڑے طیاروں کونشانہ بنایا گیا۔ تہران کے مغربی حصے میں زور دار دھماکے کی آواز بھی سنی گئی۔ آزادی ٹاور کے قریب شدید بمباری کی گئی جس میں کئی عمارتیں تباہ ہوگئیں۔ امریکا نے دعویٰ کیا ہے کہ اب تک ایران کے تینتالیس بحری جہازوں کو تباہ یا نقصان پہنچایا گیا ہے، بنکر بسٹر بموں کے ذریعے زمین کی گہرائی میں دفن بیلسٹک میزائل لانچرز بھی تباہ کردیئے۔ جبکہ اسرائیل کا دعویٰ ہے کہ بمباری سے ایران کے 6 بیسلٹک میزائل لانچر اور تین ایڈوانس دفاعی نظام بھی تباہ کردیے گئے۔