ایران کو سب سے پہلے ختم کرنا چاہتے ہیں، لڑائی میں ہم زیادہ سنجیدہ ہیں: امریکی صدر

امریکی صدر ڈونلڈ ٹرمپ نے واشنگٹن میں ایک تقریب سے خطاب کرتے ہوئے ایران کے خلاف جاری فوجی آپریشن اور مستقبل کی سیاسی حکمت عملی کے حوالے سے سخت ترین موقف اپنایا ہے۔ صدر ٹرمپ کا کہنا تھا کہ ان کی انتظامیہ کا اولین مقصد ایران کو ختم کرنا ہے اور وہ اس لڑائی میں تہران سے زیادہ سنجیدہ ہیں۔ انہوں نے دعویٰ کیا کہ امریکی حملوں میں ایرانی بحریہ کو مکمل طور پر تباہ کر دیا گیا ہے جبکہ میزائل اور ڈرون صلاحیتوں کو ختم کرنے کا آپریشن شیڈول کے مطابق جاری ہے۔ صدر نے ایرانی سفارتکاروں کو پناہ لینے کی پیشکش کرتے ہوئے کہا کہ ایران پر حملہ کرنے کے سوا کوئی چارہ نہیں بچا تھا۔ سیاسی مستقبل پر بات کرتے ہوئے صدر ٹرمپ نے واضح کیا کہ ایران کا اگلا رہنما امریکہ طے کرے گا اور خامنہ ای کے بیٹے مجتبیٰ خامنہ ای یا ان کی پالیسیاں جاری رکھنے والا کوئی بھی لیڈر قبول نہیں ہوگا۔ انہوں نے مزید کہا کہ جلد ایسے اقدامات کیے جائیں گے جن سے عالمی منڈی میں تیل کی قیمتوں کا دباؤ کم ہوگا۔