ایران کی بحری اور فضائی قوت تباہ کر دی، ایران کو ختم کرنا چاہتے ہیں: ڈونلڈ ٹرمپ

واشنگٹن: امریکی صدر ڈونلڈ ٹرمپ نے دعویٰ کیا ہے کہ امریکی حملوں کے نتیجے میں ایران کی بحری اور فضائی صلاحیتوں کو مکمل طور پر ختم کر دیا گیا ہے اور امریکا ایران کے خلاف کارروائی میں انتہائی سنجیدہ ہے۔

وائٹ ہاؤس میں میڈیا سے گفتگو کرتے ہوئے امریکی صدر نے کہا کہ امریکا کے پاس ایران پر حملے کے سوا کوئی چارہ نہیں تھا، اسی لیے ایران کی میزائل اور ڈرون صلاحیتوں کو مسلسل نشانہ بنایا جا رہا ہے۔

ڈونلڈ ٹرمپ نے دعویٰ کیا کہ ایرانی بحریہ کو مکمل طور پر تباہ کر دیا گیا ہے جبکہ ایران کے میزائل اور ڈرون نظام کو بھی تیزی سے ختم کیا جا رہا ہے۔ ان کا کہنا تھا کہ ہر گزرتے گھنٹے کے ساتھ ایران کی میزائل اور ڈرون صلاحیت کم ہو رہی ہے۔

امریکی صدر نے مزید کہا کہ ایران کے پاس اب نہ مؤثر فضائیہ باقی ہے اور نہ ہی فضائی دفاعی نظام موجود ہے جبکہ ان کے تمام طیارے بھی تباہ ہو چکے ہیں۔

ٹرمپ نے کہا کہ امریکا اس بات کو یقینی بنائے گا کہ مستقبل میں ایران کی جو بھی قیادت ہو وہ امریکا اور اسرائیل کو کسی قسم کی دھمکی نہ دے سکے۔

انہوں نے دعویٰ کیا کہ ایران نے معاہدے کے لیے رابطہ کیا تھا تاہم امریکا نے جواب دیا کہ اب بہت دیر ہو چکی ہے۔

امریکی صدر نے دنیا بھر میں تعینات ایرانی سفارت کاروں اور پاسدارانِ انقلاب کے کمانڈروں سے مطالبہ کیا کہ وہ موجودہ حکومت سے علیحدگی اختیار کر لیں۔ انہوں نے ایرانی سفارت کاروں کو مشورہ دیا کہ وہ مختلف ممالک میں پناہ حاصل کریں اور ایک نئے اور بہتر ایران کی تشکیل میں امریکا کی مدد کریں۔

ٹرمپ نے کہا کہ اگر پاسدارانِ انقلاب کے کمانڈر اپنے عہدے چھوڑ دیں تو انہیں مکمل استثنیٰ دیا جا سکتا ہے، بصورت دیگر انہیں قتل کر دیا جائے گا۔

امریکی صدر نے یہ بھی اعلان کیا کہ عالمی منڈی میں تیل کی قیمتوں پر دباؤ کم کرنے کے لیے جلد اقدامات کیے جائیں گے۔