ایران کے خلاف کارروائی دنیا کے امن کیلئے ضروری تھی، نیتن یاہو کا ٹرمپ سے اظہارِ تشکر

اسرائیل کے وزیر اعظم بینجمن نیتن یاہو نے کہا ہے کہ ایران کو جوہری ہتھیار حاصل کرنے سے روکنا عالمی امن کیلئے ناگزیر تھا اور اسی مقصد کے تحت اسرائیل نے کارروائی کی۔

میڈیا سے گفتگو کرتے ہوئے انہوں نے کہا کہ اگر ایران کو جوہری ہتھیار اور انہیں لے جانے والے میزائل نظام حاصل ہو جاتے تو وہ پوری انسانیت کیلئے سنگین خطرہ بن جاتا۔ ان کے مطابق اسرائیل اسی ممکنہ خطرے کو روکنے کیلئے عملی اقدامات کر رہا ہے۔

وزیر اعظم کا کہنا تھا کہ اسرائیل اپنی سلامتی کے دفاع کیلئے میدان میں اترا ہے، تاہم اس اقدام سے دیگر کئی ممالک کی سلامتی بھی یقینی بنائی جا رہی ہے۔

دوسری جانب ایران کے بیلسٹک میزائل حملوں میں کم از کم نو اسرائیلی شہری ہلاک ہوئے۔ بیٹ شیمش، جو تل ابیب اور یروشلم کے درمیان واقع ہے، بھی متاثرہ علاقوں میں شامل ہے۔

نیتن یاہو نے امریکی صدر ڈونلڈ ٹرمپ کا خصوصی شکریہ ادا کرتے ہوئے کہا کہ امریکا اس مہم میں اسرائیل کے ساتھ کھڑا ہے۔ انہوں نے صدر ٹرمپ کو اپنا بہترین دوست اور عظیم رہنما قرار دیتے ہوئے کہا کہ وہ دنیا کو محفوظ بنانے کی کوشش میں اسرائیل کے شانہ بشانہ ہیں۔

گزشتہ روز اسرائیلی حملے میں ایران کے روحانی پیشوا علی خامنہ ای سمیت اعلیٰ عسکری قیادت اور دیگر اہم شخصیات کے جاں بحق ہونے کی اطلاعات بھی سامنے آئی ہیں۔