وزیرِ خزانہ کی امریکی سیکرٹری کامرس سے ملاقات، اقتصادی امور پر گفتگو

واشنگٹن: وفاقی وزیرِ خزانہ محمد اورنگزیب نے واشنگٹن کے دورے کے دوران امریکی سیکرٹری کامرس ہاورڈ لٹنک سے ملاقات کی، جس کا بنیادی مقصد دونوں ممالک کے درمیان تجارت اور سرمایہ کاری کے حجم کو بڑھانا تھا۔

وزارتِ خزانہ کی جانب سے جاری کردہ اعلامیہ کے مطابق، اس ملاقات میں انفارمیشن ٹیکنالوجی (IT)، مائننگ (معدنیات) اور توانائی کے شعبوں پر خصوصی توجہ دی گئی۔ امریکی حکام نے ان شعبوں میں سرمایہ کاری کے وسیع مواقعوں پر گہری دلچسپی کا اظہار کیا۔ دونوں رہنماؤں نے معاشی تعاون کو مزید مستحکم کرنے کے عزم کا اعادہ کیا اور اس بات پر اتفاق کیا کہ بڑے منصوبوں کے لیے مستقبل میں بھی قریبی روابط برقرار رکھے جائیں گے۔

ملاقات میں 31 مارچ 2026 کو منعقد ہونے والے “یو ایس پاکستان ٹریڈ اینڈ انویسٹمنٹ فورم” کی اہمیت کو سراہا گیا۔ اس فورم میں دونوں ممالک کی ممتاز کمپنیوں اور اعلیٰ حکومتی عہدیداروں کی شرکت متوقع ہے، جس سے دوطرفہ تجارت کو نئی جہت ملنے کی امید ہے۔