ایلون مسک کا چاند پر اے آئی سیٹلائیٹس فیکٹری قائم کرنے کا منصوبہ

ٹیسلا، اسپیس ایکس اور دیگر کمپنیوں کے مالک اور دنیا کے امیر ترین شخص ایلون مسک نے چاند پر آرٹیفیشل انٹیلی جنس (اے آئی) سیٹلائیٹس فیکٹری قائم کرنے کی خواہش کا اظہار کیا ہے۔

نیویارک ٹائمز کی رپورٹ کے مطابق مسک نے یہ بات اپنی اے آئی کمپنی ایکس اے آئی کے ملازمین سے میٹنگ کے دوران کی۔ اس موقع پر انہوں نے کہا کہ وہ فیکٹری میں ایک بہت بڑی غلیل جیسی ڈیوائس بھی رکھنا چاہتے ہیں جو سیٹلائیٹس کو خلا میں لانچ کرنے میں مدد فراہم کرے گی۔

ایکس اے آئی کی جانب سے ابھی تک اس رپورٹ پر کوئی باضابطہ بیان نہیں آیا۔

ایلون مسک نے پہلے بھی خلا میں فیکٹریوں کے قیام کا ذکر کیا ہے۔ انہوں نے حال ہی میں کہا تھا کہ اے آئی میں حالیہ پیشرفت بڑے ڈیٹا سینٹرز پر انحصار کرتی ہے، جن کے لیے بہت زیادہ توانائی اور کولنگ ٹیکنالوجیز درکار ہیں۔

مسک کا کہنا تھا کہ عالمی سطح پر اے آئی کے لیے بجلی کی طلب کو پورا کرنا ممکن نہیں، لہٰذا طویل المعیاد بنیادوں پر خلا میں اے آئی مراکز کا قیام لازمی ہوگا۔ انہوں نے پوڈکاسٹ میں بتایا کہ 36 ماہ یا اس سے پہلے اے آئی مراکز کو خلا میں پہنچا دیا جائے گا۔

اگر یہ مشن کامیاب ہوا تو چاند پر انسانی بستی کے قیام کے امکانات بھی بڑھ جائیں گے اور مستقبل میں مریخ پر انسانی شہر کا قیام بھی آسان ہو جائے گا۔