امن مشن: پاکستان، سعودیہ، ترکیے، مصر کے وزرائے خارجہ کا اجلاس ہفتے کو اسلام آبادمیں ہوگا

مشرق وسطیٰ میں جنگ رکوانے اور قیام امن کےلیے پاکستان کی بھرپور سفارتی کوششیں جاری۔ امن مشن کے تحت اسلام آباد میں 29 اور 30 مارچ کو 4 ملکی اجلاس ہوگا۔

اجلاس میں پاکستان سمیت ترکیہ، سعودی عرب اور مصر کے وزرائے خارجہ شریک ہوں گے، اجلاس کی صدارت پاکستان کے نائب وزیراعظم و وزیر خارجہ اسحاق ڈار کریں گے۔

اجلاس خطے میں جاری کشیدگی کے تناظر میں منعقد کیا جا رہا ہے، جس کا مقصد ایران اور امریکا کے درمیان کشیدگی کم کرنا اورخطے میں امن واستحکام کاقیام ہے۔

دفتر خارجہ کے ترجمان نے تصدیق کرتے ہوئے کہا کہ سعودی عرب، ترکیہ اور مصر کے وزرائے خارجہ مشاورت کے لیے اسلام آباد کا دورہ کریں گے۔

نائب وزیراعظم و وزیر خارجہ اسحاق ڈار کی دعوت پر سعودی وزیرخارجہ شہزادہ فیصل بن فرحان السعود، ترکیہ کے وزیر خارجہ حکان فیدان اور مصر کے وزیر خارجہ ڈاکٹر بدر عبدالعاطی اسلام آبادپہچنیں گے۔

دفترخارجہ کے مطابق وزرائے خارجہ کے درمیان خطے میں کشیدگی کم کرنے اور باہمی دلچسپی کے مختلف امور پر تفصیلی تبادلہ خیال ہوگا، معزز مہمان وزیراعظم شہبازشریف سے بھی ملاقات کریں گے۔

نائب وزیراعظم ووزیرخارجہ اسحاق ڈار نے اس حوالے سے سوشل میڈیاپر  لکھا ہے کہ اسلام آباد میں اپنے برادر ممالک سعودی عرب، ترکیہ اور مصر کے وزرائے خارجہ کا استقبال کرنے کا منتظر ہوں۔