اسلام آبادمیں پاکستان،سعودیہ، ترکیے ،مصرکے وزرائے خارجہ کااجلاس، مشرق وسطیٰ کاتنازع مذاکرات سے طے کرنے اتفاق

مشرق وسطیٰ میں جاری کشیدگی میں کمی کے لیے  اسلام آباد میں نائب  وزیراعظم اسحاق ڈار  اور  سعودی عرب، مصر  اور  ترکیے کے  وزرائے  خارجہ کی اہم ملاقات ہوئی۔

ملاقات میں اسحاق ڈار، سعوی عرب کے وزیر خارجہ فیصل بن فرحان، ترکیےکے  وزیر خارجہ حاقان فیدان  اور  مصر کے  وزیر خارجہ  ڈاکٹر بدر عبدالعاطی شریک ہوئے۔

وزرائے خارجہ کی بیٹھک میں خطے میں کشیدگی کی صورت حال اور جنگ بندی سے متعلق امور پر گفتگو کی گئی۔ خطے میں امن اور استحکام کے لیے مذاکرات اور سفارت کاری سے معاملات حل کرنے کی کوششوں پر تبادلہ خیال ہوا۔ چاروں وزرائے خارجہ  نے مشرق وسطیٰ کا تنازع مذاکرات کے ذریعے طے کرنے پر اتفاق کیا۔

یہ اجلاس نائب وزیراعظم و وزیر خارجہ سینیٹر محمد اسحاق ڈار کی دعوت پر منعقد ہوا جس میں خطے کی بدلتی صورتحال اور باہمی دلچسپی کے امور پر تفصیلی غور کیا گیا۔

مذاکرات کا پہلا راؤنڈ ختم ہوگیا اگلا راؤنڈ جلد ہوگا جس میں دی گئی تجاویز پر پیش رفت سے ایک دوسرے کو آگاہ کیا جائے گا۔

اہم بیٹھک سے پہلے وزیر خارجہ اسحاق ڈارکا ایران کے وزیر خارجہ عباس عراقچی سے بھی رابطہ ہوا، دونوں رہنماؤں نے دیرپا امن کے لیے مذاکرات اور سفارت کاری کو واحد مؤثر راستہ قرار دیا۔

پاکستان نے ایران کے خلاف اسرائیلی اور امریکی جارحیت کی سخت مذمت کی، جنگ روکنے کی کوششوں کے لیے چار ملکی وزرائے خارجہ کے اجلاس سے متعلق بھی بات کی گئی۔