روس سے ڈیزل خریدنے کا معاہدہ جنگ لمبی کرنے کیلئے سرمایہ کاری ہے، زیلنسکی

یوکرین کے صدر ولادیمیر زیلنسکی نے یورپی ممالک اور بین الاقوامی برادری کی جانب سے روس کے ساتھ توانائی کے شعبے میں تجارتی روابط یا پابندیاں نرم کرنے کی کوششوں پر سخت ردِعمل دیتے ہوئے کہا ہے کہ روس سے ڈیزل اور پیٹرولیم مصنوعات خریدنے کا کوئی بھی معاہدہ جنگ کے خاتمے کا سبب نہیں بنے گا، بلکہ یہ پیوٹن کی جنگی مشین کو طول دینے میں براہِ راست سرمایہ کاری کے مترادف ہے۔

اپنے ایک ویڈیو بیان میں یوکرینی صدر نے واضح کیا کہ روسی صدر ولادیمیر پیوٹن کو کسی قسم کی معاشی رعایت یا تحائف دینے سے خطے میں پائیدار امن قائم نہیں ہو سکتا، بلکہ روس کو پیٹرولیم مصنوعات کی فروخت کی اجازت دینے سے اسے یوکرین کے خلاف عسکری کارروائیوں کے لیے اضافی مالی وسائل حاصل ہوں گے۔ زیلنسکی نے امریکی انتظامیہ کی جانب سے روس پر پابندیاں نرم کرنے کے ممکنہ اشاروں کو واضح کمزوری قرار دیا اور مطالبہ کیا کہ امریکہ روس پر دباؤ بڑھا کر باہمی بنیادوں پر کشیدگی میں کمی کا پائیدار معاہدہ کروائے۔ ان کا مزید کہنا تھا کہ کسی بھی قسم کی اقتصادی نرمی سے قبل میدانِ جنگ میں کشیدگی کی واضح اور مستقل کمی ضروری ہے اور یوکرین امریکہ سے توقع رکھتا ہے کہ وہ اپنے شہریوں کے دفاع کے لیے مضبوط حمایت جاری رکھے گا۔