یمنی فورسز کا حوثیوں کے خلاف 24 گھنٹوں میں 2200 کارروائیوں کا دعویٰ

یمن کی کی حکومت و مسلح افواج کے ترجمان کرنل ماجد النزیلی نے دعویٰ کیا ہے کہ یمنی فورسز نے حوثی جنگجوؤں کی پیش قدمی اور ٹھکانوں کے خلاف گزشتہ 24 گھنٹوں کے دوران مجموعی طور پر 2,200 ٹارگٹڈ ملٹری آپریشنز کیے ہیں۔

مسلح افواج کے ترجمان کے مطابق مختلف عسکری محاذوں پر سخت کارروائیاں کی گئیں، جن کے نتیجے میں حوثی فورسز کے 1,200 سے زائد جنگجو ہلاک یا شدید زخمی ہوئے، جبکہ جنگی میدان میں استعمال ہونے والی 440 سے زائد فوجی و عسکری گاڑیاں مکمل طور پر تباہ یا ناکارہ بنا دی گئیں۔

کرنل ماجد النزیلی نے میڈیا کو بتایا کہ یہ آپریشنز حوثی ملیشیا کے خلاف ملک کے متعدد حساس محاذوں پر بیک وقت کیے گئے۔ تاہم یمنی فوج کی جانب سے ان دعوؤں کی مزید تفصیلی لوکیشنز یا آزاد ذرائع سے تصدیق سے متعلق معلومات فی الحال فراہم نہیں کی گئی ہیں۔