ٹی ٹوئنٹی عالمی کپ: ویسٹ انڈیز کی زمبابوے کے خلاف بڑی فتح، بھارت پر دباؤ بڑھ گیا

آئی سی سی ٹی ٹوئنٹی ورلڈ کپ کے سپر ایٹ مرحلے میں ویسٹ انڈیز نے شاندار کارکردگی کا مظاہرہ کرتے ہوئے زمبابوے کو 107 رنز کے بھاری فرق سے شکست دے دی، جس کے بعد گروپ کی صورتحال مزید سنسنی خیز ہوگئی ہے اور بھارت کے لیے سیمی فائنل تک رسائی مشکل دکھائی دینے لگی ہے۔

ممبئی کے وانکھیڈے اسٹیڈیم میں کھیلے گئے اس میچ میں ویسٹ انڈیز کے بلے بازوں نے جارحانہ انداز اپناتے ہوئے مقررہ بیس اوورز میں 254 رنز کا پہاڑ کھڑا کر دیا۔ یہ اسکور ٹی ٹوئنٹی عالمی کپ کی تاریخ کا دوسرا بڑا مجموعہ ہے۔

ہدف کے تعاقب میں زمبابوے کی ٹیم مقررہ اوورز سے قبل 147 رنز پر آؤٹ ہوگئی اور یوں ویسٹ انڈیز کو 107 رنز کی بڑی کامیابی حاصل ہوئی۔ اس فتح کے بعد ویسٹ انڈیز گروپ ایک میں دو پوائنٹس اور 5.350 کے شاندار نیٹ رن ریٹ کے ساتھ سرفہرست آگئی ہے۔

دوسری جانب جنوبی افریقا نے بھارت کو شکست دے کر 3.800 کے نیٹ رن ریٹ اور دو پوائنٹس کے ساتھ دوسری پوزیشن سنبھال رکھی ہے، جبکہ بھارت منفی 3.800 نیٹ رن ریٹ کے باعث بغیر کسی پوائنٹ کے تیسرے نمبر پر ہے۔ زمبابوے چوتھی پوزیشن پر موجود ہے۔

بھارت کو اب ویسٹ انڈیز اور زمبابوے کے خلاف اپنے باقی دونوں میچز نہ صرف جیتنا ہوں گے بلکہ بڑے فرق سے کامیابی حاصل کرنا ہوگی، کیونکہ پوائنٹس برابر ہونے کی صورت میں نیٹ رن ریٹ فیصلہ کن کردار ادا کرے گا۔