ٹرمپ کیساتھ اچھے تعلقات، یوکرین تنازع حل کرنے کیلئے کوششوں پر شکرگزار ہیں: صدر پوتن

روسی صدر ولادیمیر پوتن نے کہا ہے کہ ان کے امریکی صدر ڈونلڈ ٹرمپ کے ساتھ کئی برسوں سے اچھے اور دوستانہ تعلقات ہیں اور وہ یوکرین تنازع کے حل کے لیے امریکی صدر کی مخلصانہ کوششوں کا خیرمقدم اور شکریہ ادا کرتے ہیں۔ ماسکو میں ‘والدائی انٹرنیشنل ڈسکشن کلب’ کے 23ویں سالانہ اجلاس سے خطاب اور شرکاء کے سوالات کے جوابات دیتے ہوئے صدر پوتن نے کہا کہ وہ یوکرین بحران کے حل کے لیے صدر ٹرمپ کے اقدامات کو قدر کی نگاہ سے دیکھتے ہیں اور انہیں یقین ہے کہ امریکی صدر تنازع کا ختم کروانے کی کوششوں میں مکمل مخلص ہیں۔

والدائی فورم سے خطاب کے دوران صدر ولادیمیر پوتن نے عالمی سیاسی حالات، نئی ٹیکنالوجیز، مغربی بالادستی کے خاتمے اور ابھرتے ہوئے کثیر قطبی (Multipolar) عالمی نظام پر تفصیلی روشنی ڈالی۔ انہوں نے کہا کہ دنیا ایک فیصلہ کن موڑ پر پہنچ چکی ہے جہاں پرانے بین الاقوامی اصول اور عالمی ادارے ناکارہ ثابت ہو رہے ہیں۔ انہوں نے اقوام متحدہ کی سلامتی کونسل میں ایشیا، افریقہ، لاطینی امریکا اور مشرقِ وسطیٰ کے ممالک کی منصفانہ نمائندگی کے لیے اصلاحات کا مطالبہ بھی کیا۔ یوکرین تنازع پر بات کرتے ہوئے انہوں نے روس کا موقف دہرایا کہ ماسکو نے جنگ کا آغاز نہیں کیا بلکہ نیٹو کے پھیلؤ اور روس مخالف پالیسیوں کی وجہ سے انہیں اپنے دفاع کے لیے یہ قدم اٹھانے پر مجبور کیا گیا۔