بجٹ 2026-27: درآمدی اور بڑی گاڑیوں پر نئے ٹیکس، قیمتوں میں مزید اضافے کا امکان

اسلام آباد: وفاقی حکومت نے نئے مالی سال کے بجٹ میں درآمدی، بڑی اور مہنگی گاڑیوں پر اضافی مالی بوجھ عائد کرنے کی تجویز پیش کرتے ہوئے برقی ٹرانسپورٹ کے شعبے کے لیے رعایتیں برقرار رکھنے کا فیصلہ کیا ہے۔

وفاقی وزیر خزانہ محمد اورنگزیب نے بجٹ تقریر میں کہا کہ درآمدی گاڑیوں پر فیڈرل ایکسائز ڈیوٹی نافذ کی جائے گی جبکہ 2 ہزار سے 3 ہزار سی سی تک کی اسپورٹس یوٹیلیٹی گاڑیوں کو بھی اس دائرے میں شامل کیا جارہا ہے۔

انہوں نے بتایا کہ 3 ہزار سی سی سے زائد انجِن صلاحیت والی گاڑیوں پر فیڈرل ایکسائز ڈیوٹی میں مزید اضافہ تجویز کیا گیا ہے۔ اسی طرح 2 کروڑ روپے سے زائد مالیت رکھنے والی برقی گاڑیوں پر بھی فیڈرل ایکسائز ڈیوٹی نافذ کرنے کی سفارش کی گئی ہے۔

وزیر خزانہ کے مطابق حکومت آٹو موبائل شعبے کی طویل مدتی پالیسی پر بھی کام کر رہی ہے اور نئی آٹو پالیسی وزیراعظم کی تشکیل کردہ کمیٹی کے زیر غور ہے، جس کا مقصد مقامی صنعت اور صارفین کے مفادات میں توازن پیدا کرنا ہے۔

بجٹ تجاویز کے مطابق برقی موٹرسائیکلوں، رکشوں اور بسوں کے لیے موجودہ ٹیکس مراعات برقرار رکھی جائیں گی، جبکہ بیرون ملک سے درآمد کیے جانے والے برقی ٹرکوں پر ایک فیصد سیلز ٹیکس کی خصوصی سہولت دینے کی تجویز بھی شامل ہے۔

محمد اورنگزیب نے اپنی تقریر میں یہ بھی اعلان کیا کہ بین الاقوامی پروازوں میں بزنس کلاس کے مسافروں پر عائد فیڈرل ایکسائز ڈیوٹی ختم کردی گئی ہے، جسے کاروباری اور سفری شعبے کے لیے ایک مثبت اقدام قرار دیا جارہا ہے۔