عظمیٰ بخاری فیک ویڈیو کیس: عدالت کا فریقین کو عدالتی تقدس برقرار رکھنے کا حکم

ضلع کچہری لاہور کے جوڈیشل مجسٹریٹ نعیم وٹو نے پنجاب کی صوبائی وزیر اطلاعات و ثقافت عظمیٰ بخاری کی مبینہ جعلی ویڈیو وائرل کرنے کے مقدمے کی گزشتہ سماعت کا تحریری حکم نامہ جاری کر دیا ہے۔ عدالتی حکم میں دورانِ سماعت فریقین اور وکلا کے درمیان ہونے والی بدنظمی کا سخت نوٹس لیتے ہوئے تمام فریقین کو عدالت کا تقدس اور نظم و ضبط برقرار رکھنے کی ہدایت کی گئی ہے۔ عدالت نے واضح کیا کہ اوپن کورٹ تک رسائی کا مقصد کارروائی میں خلل ڈالنا نہیں ہے، اور آئندہ ایسی حرکت پر ضابطہ فوجداری (CrPC) کی دفعہ 352 کے تحت اوپن کورٹ کی پابندی عائد کی جا سکتی ہے۔

تحریری حکم نامے کے مطابق سماعت کے دوران شریک ملزم شہاب الدین پر فردِ جرم عائد کر دی گئی ہے، جبکہ صوبائی وزیر عظمیٰ بخاری نے بطور مدعی اپنا بیان قلمبند کروایا۔ عظمیٰ بخاری نے عدالت میں موقف اختیار کیا کہ ان کی جعل سازی پر مبنی ویڈیو سوشل میڈیا پر پھیلا کر ان کی شخصیت کو نشانہ بنایا گیا، لہٰذا صوبائی ذمہ داریوں کے پیشِ نظر اور تاخیری حربوں سے بچنے کے لیے ان کے بیان پر فوری جرح کی جائے۔ عدالت نے عظمیٰ بخاری کے بیان پر جرح کے لیے 12 ستمبر کی تاریخ مقرر کرتے ہوئے وکلا اور فریقین کو آئندہ سماعت پر پیش ہونے کا حکم دیا ہے۔