امریکی سینیٹ کا صدر ٹرمپ کو وینزویلا میں کانگریس کی اجازت کے بغیر فوجی کارروائی سے روکنے کا اقدام

امریکی سینیٹ نے صدر ڈونلڈ ٹرمپ کو وینزویلا میں مزید فوجی کارروائی سے روکنے کی جانب اہم قدم اٹھاتے ہوئے وار پاورز ریزولوشن پر بحث کی منظوری دے دی ہے، جس کے تحت صدر کو کسی بھی نئی فوجی مداخلت کے لیے کانگریس سے اجازت لینا ہوگی۔

یہ پیش رفت وینزویلا کے طاقتور رہنما نکولس مادورو کی گرفتاری کے پانچ روز بعد سامنے آئی ہے۔ سینیٹ میں قرارداد کے حق میں 52 جبکہ مخالفت میں 47 ووٹ پڑے، دلچسپ طور پر ٹرمپ کی ریپبلکن پارٹی کے پانچ سینیٹرز نے پارٹی لائن سے ہٹ کر ڈیموکریٹس کا ساتھ دیا، جبکہ ایک ریپبلکن سینیٹر نے ووٹنگ میں حصہ نہیں لیا۔

صدر ٹرمپ نے سینیٹ کے اقدام پر سخت ردعمل دیتے ہوئے سوشل میڈیا پر کہا کہ یہ ووٹ امریکا کے دفاع اور قومی سلامتی کو کمزور کرتا ہے اور صدر کے بطور کمانڈر اِن چیف اختیارات میں مداخلت ہے۔ انہوں نے وار پاورز ایکٹ کو بھی غیر آئینی قرار دیا اور قرارداد کے حق میں ووٹ دینے والے ریپبلکن ارکان پر شدید تنقید کی۔

دوسری جانب قرارداد کے حامی سینیٹرز کا کہنا ہے کہ امریکا کو وینزویلا میں کسی لامتناہی جنگ کی طرف نہیں دھکیلا جا سکتا۔ ڈیموکریٹ سینیٹر ٹم کین کے مطابق جنگ اور امن کے فیصلوں میں کانگریس کا کردار آئینی ذمہ داری ہے۔

واضح رہے کہ یہ قرارداد قانون بننے کے لیے سینیٹ اور ایوانِ نمائندگان دونوں سے منظوری کی محتاج ہے، جبکہ وائٹ ہاؤس نے اس کی مخالفت کرتے ہوئے مؤقف اپنایا ہے کہ صدر نے امریکی شہریوں کے تحفظ کے لیے آئینی اختیارات کے تحت کارروائی کی۔