امریکا نے لاطینی امریکا میں سیکڑوں فوجی بھیجنے کا فیصلہ کر لیا

امریکی انتظامیہ نے لاطینی امریکہ میں اپنے سیکڑوں فوجی اہلکار تعینات کرنے کا فیصلہ کیا ہے، جس کا بنیادی مقصد منشیات کے عالمی اسملگروں اور بین الاقوامی ڈرگ کارٹلز کے خلاف آپریشنز کو تیز کرنا اور خطے میں سیکیورٹی تعاون کو بڑھانا ہے۔

امریکی اخبار ‘نیویارک ٹائمز’ کی رپورٹ کے مطابق پینٹاگون (امریکی وزارتِ دفاع) نے لاطینی امریکہ میں اپنی ملٹری سرگرمیاں نمایاں طور پر بڑھا دی ہیں۔ اس سلسلے میں امریکی فوج کے 600 اہلکاروں پر مشتمل ایک خصوصی بٹالین کے دستوں نے پاناما پہنچنا شروع کر دیا ہے۔ یہ امریکی فوجی اہلکار پاناما، کولمبیا اور ہنڈوراس میں مقامی سیکیورٹی فورسز کے ساتھ مشترکہ تربیتی مشقوں اور انسدادِ منشیات کی کارروائیوں میں حصہ لیں گے۔

رپورٹ میں واضح کیا گیا ہے کہ ان عسکری سرگرمیوں کا براہِ راست تعلق لاطینی امریکہ سے امریکہ میں داخل ہونے والی منشیات کی روکتھام اور بارڈر سیکیورٹی کو مضبوط بنانے کی امریکی کوششوں سے ہے۔ تاہم، پینٹاگون کی جانب سے ان فوجی اہلکاروں کی مکمل تعیناتی کے شیڈول اور مخصوص آپریشنل تفصیلات کو فی الحال عام نہیں کیا گیا ہے۔