ایران میں 1000 سے زائد اہداف نشانہ بنائے، امریکا کا پاسداران انقلاب ہیڈکوارٹر تباہ کرنے کا دعویٰ

واشنگٹن: امریکی سینٹرل کمانڈ نے دعویٰ کیا ہے کہ ایران میں جاری کارروائیوں کے دوران ایک ہزار سے زائد اہداف کو نشانہ بنایا گیا ہے۔

امریکی سینٹرل کمانڈ کی جانب سے جاری بیان میں کہا گیا کہ ایران میں بڑے پیمانے پر فضائی حملے جاری ہیں اور اہم عسکری تنصیبات کو نشانہ بنایا گیا ہے۔ بیان کے مطابق جن اہداف پر حملے کیے گئے ان میں پاسداران انقلاب اسلامی کا ہیڈکوارٹر بھی شامل ہے۔

کمانڈ کے مطابق آئی آر جی سی ایرو اسپیس فورس کے ہیڈکوارٹر کو بھی نشانہ بنایا گیا۔ مزید کہا گیا کہ ایرانی بیلسٹک میزائل سائٹس اور ایرانی بحریہ کے بعض جہازوں پر بھی حملے کیے گئے ہیں۔

بیان میں حملوں کی نوعیت اور نقصانات کی تفصیلات فراہم نہیں کی گئیں، جبکہ ایرانی حکام کی جانب سے اس دعوے پر تاحال کوئی باضابطہ ردعمل سامنے نہیں آیا۔