جنوبی لبنان کے کچھ حصوں پر قبضہ یا الحاق بارے اسرائیلی بیانات انتہائی تشویشناک ہیں: اقوام متحدہ

اقوامِ متحدہ کے انسانی حقوق کے عہدیدار نے جنوبی لبنان کے کچھ حصوں پر اسرائیلی قبضے یا الحاق سے متعلق حالیہ بیانات کو انتہائی تشویشناک قرار دیتے ہوئے عالمی برادری کو خطرے سے آگاہ کیا ہے۔ عہدیدار کے مطابق، اسرائیل کی جانب سے لبنان کے مجموعی رقبے کے تقریباً 14 فیصد حصے کو خالی کرنے کی دھمکیاں دی گئی ہیں، جس میں جنوبی لبنان کا پورا علاقہ، بیروت کے جنوبی مضافات اور وادی بقاع کے اہم مقامات شامل ہیں۔ ان اقدامات کے نتیجے میں لاکھوں لبنانی شہری جبری نقل مکانی پر مجبور ہو چکے ہیں۔

رپورٹ کے مطابق اسرائیلی فوج نے جنوبی سرحد کے قریبی دیہات میں درجنوں گھروں اور دکانوں کو منظم طریقے سے مسمار کر دیا ہے، جو کہ انسانی حقوق کی سنگین خلاف ورزی ہے۔ اقوامِ متحدہ کے عہدیدار نے خبردار کیا ہے کہ جب تک لبنانی عوام مسلسل گولہ باری، بے گھری اور ممکنہ حملوں کے خوف میں زندگی گزارنے پر مجبور ہیں، خطے میں پائیدار امن کا قیام ناممکن رہے گا۔ انہوں نے مزید کہا کہ اسرائیلی حکام کے بیانات اور زمینی اقدامات الحاق کے جس رجحان کی عکاسی کر رہے ہیں، وہ بین الاقوامی قوانین کی کھلی خلاف ورزی ہے۔