اقوام متحدہ میں پاکستان کی پیش کردہ 3 قراردادیں بھاری اکثریت سے منظور

اقوام متحدہ کی 81 ویں جنرل اسمبلی کی تخفیفِ اسلحہ اور بین الاقوامی سلامتی سے متعلق پہلی کمیٹی (First Committee) نے پاکستان کی جانب سے پیش کردہ تین اہم اور عالمی نوعیت کی قراردادیں بھاری اکثریت سے منظور کر لی ہیں۔

ترجمان دفترِ خارجہ کی جانب سے سماجی رابطے کی ویب سائٹ (X) پر جاری کردہ تفصیلات کے مطابق، یہ قراردادیں جوہری ہتھیار نہ رکھنے والی ریاستوں کے لیے سلامتی کی بین الاقوامی یقین دہانیوں، علاقائی سطح پر اسلحہ کے کنٹرول اور باہمی اعتماد سازی کے اقدامات (CBMs) سے متعلق پاکستان کی دیرینہ سفارتی کوششوں کے لیے عالمی برادری کی جانب سے مسلسل اعتراف اور حمایت کا مظہر ہیں۔

منظور کی جانے والی قراردادوں میں سے “علاقائی اور ذیلی علاقائی تناظر میں اعتماد سازی کے اقدامات” سے متعلق قرارداد اتفاقِ رائے سے (بغیر کسی ووٹنگ کے) منظور کی گئی، جبکہ “علاقائی اور ذیلی علاقائی سطح پر روایتی ہتھیاروں کے کنٹرول” سے متعلق پاکستان کی دوسری قرارداد کو 180 ممالک کے ووٹوں کی بھاری اکثریت حاصل ہوئی۔ اس کے علاوہ، “غیر جوہری ریاستوں کو ایٹمی ہتھیاروں کے استعمال یا استعمال کی دھمکی کے خلاف سلامتی کی ضمانت” پر مبنی تیسری اہم قرارداد 122 ووٹوں سے منظور ہوئی جبکہ اس کے خلاف کوئی ووٹ نہیں آیا۔

عالمی سطح پر بڑھتی ہوئی جیو پولیٹیکل کشیدگی اور بین الاقوامی اسلحہ کنٹرول فریم ورک کے کمزور ہوتے نظام کے دور میں، پاکستان دہائیوں سے اقوام متحدہ میں ان ترجیحی امور کی قیادت کر رہا ہے۔ یہ قراردادیں خطرات میں کمی، خطے میں طاقت کے توازن اور عالمی و علاقائی امن و استحکام کے لیے ایک عملی اور تعاون پر مبنی روڈ میپ فراہم کرتی ہیں۔