یو اے ای یمن میں عسکری یا مالی معاونت کا عمل فوری بند کرے: سعودی عرب

سعودی عرب نے متحدہ عرب امارات (یو اے ای) سے مطالبہ کیا ہے کہ وہ یمنی حکومت کے مطالبے کے مطابق 24 گھنٹوں کے اندر اپنی فوج یمن سے واپس بلائے اور کسی بھی فریق کو عسکری یا مالی معاونت فوری طور پر بند کرے۔

سعودی وزارتِ خارجہ کی جانب سے جاری بیان میں کہا گیا ہے کہ یمن کے امن کا واحد راستہ مذاکرات ہیں۔ بیان میں کہا گیا کہ یو اے ای کی جانب سے یمنی جنوبی عبوری کونسل (STC) پر دباؤ ڈال کر کارروائیوں پر آمادہ کرنا افسوسناک ہے، اور یہ اقدام سعودی قومی سلامتی، جمہوریہ یمن کے امن اور پورے خطے کے استحکام کے لیے خطرہ ہے۔

سعودی عرب کا کہنا ہے کہ یہ اقدامات یمنی حکومت کی حمایت کے لیے قائم عرب اتحاد کے اصولوں سے مطابقت نہیں رکھتے۔ بیان میں واضح کیا گیا کہ قومی سلامتی کو لاحق کسی بھی خطرے کو ریڈ لائن سمجھا جائے گا اور اس کے سدباب کے لیے ضروری اقدامات سے گریز نہیں کیا جائے گا۔

سعودی عرب نے یمن کی صدارتی قیادت کونسل (PLC) اور اس کی حکومت سے مکمل یکجہتی کا اظہار کرتے ہوئے کہا کہ وہ یمن کے امن، استحکام اور خودمختاری کی مکمل حمایت جاری رکھے گا۔

بیان میں مزید کہا گیا کہ یمن کے جنوبی مسئلے کے تاریخی اور سماجی پہلو موجود ہیں اور اس کا حل جامع سیاسی عمل اور مذاکرات کی میز پر ہی ممکن ہے، جن میں جنوبی عبوری کونسل سمیت تمام یمنی فریقین شامل ہوں۔ سعودی عرب نے ایک بار پھر یو اے ای سے مطالبہ کیا کہ وہ یمنی حکومت کے مطالبے کے مطابق 24 گھنٹوں میں اپنی فوج واپس بلائے اور کسی بھی قسم کی عسکری یا مالی معاونت بند کرے۔

سعودی عرب کے مطابق دانشمندی، اخوت اور حسنِ ہمسائیگی کو ترجیح دی جائے گی اور خلیجی تعاون کونسل (GCC) کے رکن ممالک کے درمیان مضبوط تعلقات کو اولین حیثیت دی جائے گی۔

واضح رہے کہ اس سے قبل یمن کی صدارتی کونسل کے سربراہ رشاد العلیمی نے یو اے ای کے ساتھ مشترکہ دفاعی معاہدہ منسوخ کرنے کا اعلان کیا تھا، جس کے بعد خطے میں کشیدگی میں اضافہ دیکھنے میں آیا ہے۔