شام نے کیمیائی ہتھیاروں سے متعلق ایک لاکھ سے زائد سرکاری دستاویزات عالمی ادارے کے حوالے کر دیں

شامی وزیرِ خارجہ اسعد الشیبانی نے انکشاف کیا ہے کہ شام نے کیمیائی ہتھیاروں کی روک تھام کی عالمی تنظیم ‘او پی سی ڈبلیو’ (OPCW) کو 1 لاکھ سے زائد اہم سرکاری دستاویزات فراہم کر دی ہیں، جن میں سابق صدر بشار الاسد کے دورِ حکومت میں پوشیدہ رکھی گئی کیمیائی تنصیبات، ذخیرہ گاہوں اور ممنوعہ اسلحے کی تفصیلی معلومات شامل ہیں۔

اسعد الشیبانی نے بتایا کہ شام نے گزشتہ حکومت سے ورثے میں ملنے والے کیمیائی ہتھیاروں کے باضابطہ اعلامیے میں بنیادی اصلاحات کا عمل شروع کر دیا ہے، جبکہ او پی سی ڈبلیو کی براہِ راست نگرانی میں 42 کیمیائی فضائی بم کامیابی سے تلف کیے جا چکے ہیں۔ شامی وزیرِ خارجہ نے مزید کہا کہ شام نے 9 جولائی کو کیمیائی ہتھیاروں کی ممانعت کی تنظیم (OPCW) میں اپنے معطل شدہ حقوق اور مراعات دوبارہ حاصل کر لیے تھے اور اب کیمیائی پروگرام سے جڑے تمام مابقی تنازعات کے حل کے لیے ایک مشترکہ لائحہ عمل مرتب کر لیا گیا ہے۔

انہوں نے مزید وضاحت کی کہ میدانِ جنگ میں بچھائی گئی بارودی سرنگیں اور تباہ شدہ تنصیبات کیمیائی ہتھیاروں سے متعلق معائنہ کاری اور تحقیقات میں تاحال بڑی رکاوٹیں ہیں، تاہم اتنے بڑے پیمانے پر دستاویزات کی فراہمی اور شفافیت کا مقصد ماضی کے متنازع کیمیائی پروگرام کے تمام باب بند کر کے عالمی برادری کے خدشات کو دور کرنا ہے۔