آزاد کشمیر میں پنجاب طرز کا ’’ستھرا کشمیر‘‘ پروگرام شروع کرنے کا فیصلہ

آزاد کشمیر کی نئی حکومت نے اپنے اہم ترین 100 روزہ اصلاحاتی ایجنڈے کے تحت پنجاب کے معروف صفائی ماڈل ‘ستھرا پنجاب’ کی طرز پر ‘ستھرا کشمیر’ پروگرام کا باضابطہ آغاز کر دیا ہے۔ اس فلاحی و انتظامی منصوبے کے تحت آزاد جموں و کشمیر بھر میں سالڈ ویسٹ مینجمنٹ (کوڑا کرکٹ کی منتقلی و تلفی) کا پورا نظام نجی شعبے (پرائیویٹ سیکٹر) کے حوالے کرنے کا حتمی فیصلہ کیا گیا ہے۔ سیکرٹری مقامی حکومت و دیہی ترقی ارشاد احمد قریشی کی زیرِ صدارت انعقاد پذیر ہونے والے اجلاس میں طے پایا کہ حکومت اور سرکاری ادارے آئندہ براہِ راست صفائی انجام دینے کے بجائے ایک مانیٹرنگ اور ریگولیٹر کا کردار ادا کریں گے، جبکہ تمام اضلاع میں صفائی کی خدمات حاصل کرنے کے لیے ایک ہفتے کے اندر اخبارات میں بین الاقوامی و قومی سطح کے اشتہارات شائع کیے جائیں گے۔

اجلاس میں فیصلے کی تفصیلات بتاتے ہوئے سیکرٹری لوکل گورنمنٹ نے واضح کیا کہ معاہدوں کی منظوری کے بعد صفائی کے لیے جدید مشینری، گاڑیاں اور بنیادی افرادی قوت آؤٹ سورس شدہ نجی کمپنیاں ہی فراہم کریں گی۔ آزاد کشمیر بھر میں صفائی کے نظام اور سینٹری ورکرز کی یکسانیت کے لیے مخصوص یونیفارم اور ایک ہی ڈیزائن کی گاڑیاں مقرر کی جائیں گی۔ یہ پروگرام صرف مظفرآباد یا بڑے شہروں تک محدود نہیں رہے گا بلکہ دیہی علاقوں، یوتھ کونسلرز اور خواتین کونسلرز کی شراکت سے ہر گاؤں کے گھر گھر سے کوڑا جمع کر کے مناسب تلفی یقینی بنائی جائے گی۔ میئرز میونسپل کارپوریشنز مظفرآباد، کوٹلی، حویلی، سدھنوتی اور چیئرمین ضلع کونسل باغ و نیلم ویلی نے اس اقدام کو سراہتے ہوئے کہا کہ یہ منصوبہ آزاد کشمیر کے قدرتی حسن اور ماحولیات کو محفوظ بنانے میں کلیدی کردار ادا کرے گا۔