آبنائے ہرمز سے گزرنے والے جہازوں پر نیا ٹول سسٹم لاگو ہوگا: ایران

ایران نے اعلان کیا ہے کہ آبنائے ہرمز سے گزرنے والے ہر جہاز کو نئے کنٹرول نظام کے تحت ٹول ادا کرنا ہوگا۔

یہ اعلان ایرانی پارلیمانی نیشنل سکیورٹی کونسل کے سربراہ ابراہیم عزیزی کی جانب سے سامنے آیا، جنہوں نے روسی میڈیا سے گفتگو میں کہا کہ ایران قومی مفادات کے تحت آبنائے ہرمز پر کنٹرول اور مینجمنٹ کا نیا نظام قائم کرے گا۔

انہوں نے واضح کیا کہ اس نظام کے تحت آبنائے ہرمز سے گزرنے والے ہر جہاز سے فیس وصول کی جائے گی، جبکہ اس اقدام کا مقصد خطے میں بہتر انتظام اور قومی مفادات کا تحفظ ہے۔

ابراہیم عزیزی نے یہ بھی کہا کہ موجودہ حالات میں امریکا پر مکمل اعتماد نہیں کیا جا سکتا، اس لیے ایران اپنے سیکیورٹی اور معاشی فیصلے خود کرے گا۔

ایرانی میڈیا سے گفتگو کرتے ہوئے انہوں نے بتایا کہ لاوان ریفائنری کا کچھ حصہ تقریباً 10 دن میں دوبارہ فعال ہو سکتا ہے، جبکہ مجموعی طور پر متاثرہ ریفائننگ صلاحیت 2 ماہ میں 70 سے 80 فیصد تک بحال ہونے کی امید ہے۔

ان کے مطابق حملوں کے باوجود ایران توانائی کے شعبے میں تیزی سے بحالی کے اقدامات کر رہا ہے اور اہم تنصیبات کو مرحلہ وار دوبارہ فعال بنایا جا رہا ہے۔

انہوں نے کہا کہ حکومت توانائی کے شعبے میں استحکام کے لیے تمام ضروری اقدامات کر رہی ہے تاکہ ملکی پیداوار معمول پر آ سکے۔