میر رضا کیس: جے آئی ٹی تشکیل دینے کی درخواست پر تحریری حکم نامہ جاری

سندھ ہائیکورٹ نے میر رضا کے اہلخانہ کی جانب سے جے آئی ٹی (JIT) تشکیل دینے کی درخواست پر تحریری حکم نامہ جاری کرتے ہوئے درخواست نمٹا دی ہے۔ عدالت نے اپنے فیصلے میں واضح کیا کہ ہائیکورٹ آئینی اختیار استعمال کرتے ہوئے جے آئی ٹی کی تشکیل کا حکم نہیں دے سکتی اور نہ ہی عدالت جاری تفتیش میں مداخلت کر کے تفتیش کار کا کردار ادا کر سکتی ہے۔ فیصلے میں کہا گیا ہے کہ مقدمے میں انسدادِ دہشت گردی ایکٹ کی دفعات شامل نہیں ہیں، اور اگر ہوتیں تب بھی جے آئی ٹی کا قیام حکومت کا اختیار ہوتا ہے۔ مزید برآں، سندھ حکومت کی جانب سے 24 اگست کو سنگل ممبر جوڈیشل انکوائری کمیشن کی تشکیل کے گزٹ نوٹیفکیشن اور کمیشن کی کارروائی کے آغاز کے بعد یہ سوال غیر مؤثر ہو چکا ہے۔ عدالت نے میر رضا کے اہلخانہ سے اظہارِ تعزیت کرتے ہوئے قرار دیا کہ ہمدردی کے جذبات کو قانون کے طے شدہ اصولوں پر غالب نہیں لایا جا سکتا۔