سندھ ہائیکورٹ کا کراچی کاٹن ایکسچینج کی عمارت فوری ڈی سیل کر کے قبضہ درخواست گزاروں کے حوالے کرنے کا حکم

سندھ ہائیکورٹ نے کراچی کاٹن ایکسچینج کی عمارت کو فوری طور پر ڈی سیل کرنے اور اس کا قبضہ درخواست گزاروں کو منتقل کرنے کا تحریری حکم نامہ جاری کر دیا ہے۔ عدالت میں متروکہ وقف املاک بورڈ کے خلاف سابقہ عدالتی احکامات پر عملدرآمد نہ کرنے پر دائر توہینِ عدالت کی درخواست پر سماعت ہوئی، جس میں عدالت نے قرار دیا کہ متروکہ وقف املاک نے حکم پر عمل کرنے کے بجائے عمارت کو اپنی ملکیت قرار دینے کا نوٹیفکیشن جاری کیا، جو بظاہر توہینِ عدالت کے زمرے میں آتا ہے۔ دوسری جانب ایڈمنسٹریٹر متروکہ وقف املاک آصف خان کے اس مؤقف کے بعد بھی کہ فیصلہ عدالتی احکامات کے عین مطابق تھا، عدالت نے ایڈمنسٹریٹر کو عمارت فوری ڈی سیل کرنے کا حکم دیتے ہوئے 10 ستمبر تک عملدرآمد رپورٹ پیش کرنے کی ہدایت جاری کر دی ہے۔