سندھ اسمبلی کا اجلاس: لوکل گورنمنٹ ایکٹ میں ترمیم کیلئے خصوصی کمیٹی قائم

سندھ اسمبلی کا اہم اجلاس اسپیکر کی صدارت میں منعقد ہوا، جس میں سیاسی و انتظامی امور اور قانون سازی کے حوالوں سے اہم فیصلوں کی منظوری دی گئی۔ اجلاس کے دوران سندھ لوکل گورنمنٹ ایکٹ 2013 میں ترمیم کی تجویز کا جائزہ لینے کے لیے 12 رکنی خصوصی کمیٹی قائم کر دی گئی۔ یہ کمیٹی ایک ہفتے کے اندر مجوزہ بل پر اپنی بحث و تحصیص مکمل کرے گی۔ ترمیم کے تحت میئر، ڈپٹی میئر، چیئرمین اور وائس چیئرمین کے اختیارات اور ذمہ داریوں کا واضح تعین کیا جائے گا۔ اس کے علاوہ بلدیاتی کونسلوں میں چیئرمین اور وائس چیئرمین کے خلاف عدم اعتماد کی قرارداد کے لیے دو تہائی اکثریت کا ہونا لازمی قرار دیا جائے گا، جبکہ نئے منتخب نمائندوں کے حلف اٹھانے تک سبکدوش نمائندے ایڈمنسٹریٹر کے طور پر ذمہ داریاں نبھائیں گے۔

قانون سازی کے مرحلے کے دوران سندھ اسمبلی نے ‘صوبائی موٹر وہیکل ترمیمی بل 2026’ کثرتِ رائے سے منظور کر لیا۔ صوبائی وزیر مکیش کمار چاولہ نے بل کی تفصیلات بتاتے ہوئے کہا کہ سابقہ قانون کے تحت ایک ماہ میں غیر رجسٹرڈ گاڑی پر جرمانہ عائد کیا جاتا تھا، تاہم اب نئے ترمیمی بل کے تحت شو روم میں کھڑی گاڑیوں پر چھ ماہ تک کوئی جرمانہ لاگو نہیں ہو گا۔ اس کے ساتھ ساتھ ایوان نے ‘سندھ آبکاری ایکٹ ترمیمی بل’ کی بھی باضابطہ منظوری دے دی۔