نئے صوبوں یا انتظامی یونٹس کا فیصلہ اسمبلیوں نے کرنا ہے: شرجیل میمن

سندھ اسمبلی کے اجلاس میں اظہارِ خیال کرتے ہوئے سینئر صوبائی وزیر شرجیل انعام میمن نے کہا ہے کہ پاکستان کو آئین کے تحت ہی چلنا ہے اور نئے صوبوں یا انتظامی یونٹس کی تشکیل کا حتمی فیصلہ اسمبلیاں کرتی ہیں، جس پر سندھ اسمبلی متعدد بار اپنی واضح قراردادیں منظور کر چکی ہے۔ انہوں نے کہا کہ نئے صوبوں کے حوالے سے پاکستان پیپلزپارٹی کا موقف چیئرمین بلاول بھٹو زرداری پہلے ہی سامنے لا چکے ہیں۔

سینئر صوبائی وزیر شرجیل میمن نے سندھ کے تاریخی اور ثقافتی پس منظر کو اجاگر کرتے ہوئے کہا کہ سندھ کی تاریخ اور تہذیب 5 ہزار سال پرانی ہے اور یہاں کے عوام اپنی مٹی سے والہانہ عقیدت اور رومانس رکھتے ہیں۔ انہوں نے مزید کہا کہ سندھ کے غیور لوگ جس قدر پاکستان کی ترقی و سلامتی سے محبت کرتے ہیں، اتنی ہی محبت اور وابستگی اپنی سندھ دھرتی سے بھی رکھتے ہیں۔