حتمی مالکان کی تفصیلات جمع نہ کروانے پر 28 ہزار 761 کمپنیوں کو شوکاز نوٹس

سکیورٹیز اینڈ ایکسچینج کمیشن آف پاکستان (SECP) نے کارپوریٹ شفافیت کو یقینی بنانے کے لیے حتمی مالکان (Ultimate Beneficial Owners) کی تفصیلا ت فراہم نہ کرنے والی 28 ہزار 761 کمپنیوں کو شوکاز نوٹس جاری کر دیے ہیں۔ ایس ای سی پی کے مطابق ان کمپنیوں نے کمپنیز ایکٹ 2017 کے تحت لازمی ’فارم 19‘ جمع نہیں کروایا تھا، جس میں کمپنی کے 25 فیصد یا اس سے زائد حصص و ووٹنگ حقوق رکھنے والے یا موثر کنٹرول رکھنے والے افراد کی معلومات درج کرنا قانونی تقاضا ہے۔ کمیشن نے تمام متعلقہ کمپنیوں کو فارم 19 جمع کروانے کے لیے 30 روز کی مہلت دیتے ہوئے خبردار کیا ہے کہ مقررہ مدت میں تعمیل نہ کرنے کی صورت میں قانون کے مطابق سخت قانونی کارروائی عمل میں لائی جائے گی۔